ՀՀ ՔՏՀԱ տեսչական մարմնի ներկայացուցիչները Արարատի մարզում ծանոթացել են սուբվենցիոն ծրագրով իրականացվող շինարարությանը

ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավարի տեղակալները դեկտեմբերի 12-ին այցելել են Արարատի մարզ, որտեղ ծանոթացել են Ուրցաձոր համայնքի մանկապարտեզի վերակառուցման, Արտաշատի պոլիկլինիկայի հիմնանորոգման աշխատանքներին, ինչպես նաև Այգեստան բնակավայրի դպրոցի կառուցման աշխատանքներին։ 

Այս մասին հայտնում են տեսչական մարմնի մամուլի ծառայությունից:  

ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավարի տեղակալներ Սուրեն Մինասյանը, Արազ Պապիկյանը, ՏՄ իրավական աջակցության և փաստաթղթաշրջանառության վարչության պետ Վարազդատ Պոկացյանը՝  Արարատի տարածքային ստորաբաժանման ղեկավար Արգամ Կոստումյանի ուղեկցությամբ  և տարածքային ստորաբաժանման մասնագետները վերահսկողական  շրջայցեր են իրականացրել Արարատի մարզի տարբեր բնակավայրերում՝ տեղում ծանոթանալու համայնք-պետություն համագործակցությամբ պետական և սուբվենցիոն ծրագրով շրջանակներում իրականացվող մի շարք շինարարական աշխատանքների ընթացքին։  

Ուրցաձոր համայնքի մանկապարտեզի վերակառուցման աշխատանքներում  Տեսչական մարմնի մասնագետների տեղազննության և տեղում առկա աշխատանքային նախագծի ուսումնասիրությամբ հայտնաբերվել են անհամապատասխանություններ՝ նախագծի և կատարված  աշխատանքների միջև։ Տեղում կապալառու կազմակերպությանը  տրվել է ցուցում դադարեցնել շինարարական աշխատանքները և շինությունը բերել նախագծային տեսքի։

Ըստ աղբյուրի՝ արձանագրվել է նաև Արարատի մարզի Այգեստան բնակավայրում դպրոցի կառուցման շինարարական աշխատանքներում ընդգրկված աշխատակիցներն  ապահովված չէին անհատական պաշտպանիչ միջոցներով, որի հիմքով  Տեսչական մարմինը դիմել է գործընկեր՝ ՀՀ առողջապահական և աշխատանքի տեսչական մարմին,  առաջարկվելով  իր իրավասությունների շրջանակներում ձեռնարկել համապատասխան միջոցներ։ 

Արտաշատի պոլիկլինիկայի հիմնանորոգման աշխատանքների ընթացիկ փուլում տրվել են ցուցումներ շինարարական   աշխատանքների վերաբերյալ, մասնավորապես՝  նախագծով նախատեսված  թեքահարթակը  ենթարկել փոփոխության և  այն կառուցել  շինարարական  նորմերին  համապատասխան։ 

ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար կազմի  կողմից ՀՀ տարբեր մարզեր  նմանատիպ վերահսկողական այցերը լինելու են պարբերաբար և շարունակական։