Սիրիայի նոր իշխանությունները հայտարարել են` կպահպանեն Թուրքիայի հետ ռազմավարական հարաբերությունները

Սիրիայի նոր իշխանությունները մտադիր են ռազմավարական հարաբերություններ պահպանել իրենց հարեւան Թուրքիայի հետ, գրում է Euromedia24-ը։

 

«Մենք կունենանք ռազմավարական հարաբերություններ Թուրքիայի հետ: Թուրքիան շատ առաջնահերթություններ ունի նոր սիրիական պետության ստեղծման հարցում: Կլինեն փոխադարձ առևտրային կապեր, մենք հավատում ենք, որ Թուրքիան տնտեսական զարգացման իր փորձը կփոխանցի Սիրիա»,- Yeni Şafak թերթին ասել է Դամասկոսում իշխանության եկած զինված խմբավորումների առաջնորդ Ահմեդ ալ-Շարաան, ով հայտնի է Աբու Մուհամեդ ալ Ջուլանի մականունով։

 

Ալ-Շարաան հույս է հայտնել, որ 2011 թվականից փախած սիրիացիների կեսը կվերադառնա հայրենիք։ «Սիրիացիները ապաստան գտան շատ երկրներում, բայց Թուրքիան ամենից շատ ընդունեց նրանց, ավելի շատ հարգանքով վերաբերվեց նրանց, քան մյուսներին», - ավելացրել է նա:

 

Թուրքիայի ներքին գործերի նախարարության տվյալներով՝ հանրապետության տարածքում կարող են լինել 2,9 միլիոն սիրիացի փախստականներ։ Թուրքիայի նախագահ Թայիփ Էրդողանը ավելի վաղ հայտարարել էր մոտ 1 միլիոն փախստականների Սիրիա վերադարձն ապահովելու ծրագրերի մասին։