Եվրոպան Ուկրաինային 100 հազար զինվոր է ուղարկելու․ Reuters

Եվրոպական երկրները քննարկում են զինադադարի կամ խաղաղության դեպքում Ուկրաինա ռազմական կոնտինգենտ ուղարկելու հարցը, որը կարող է կազմել մինչև 100 հազար զինվոր։ Այս մասին հայտնում է Reuters գործակալությունը՝ վկայակոչելով եվրոպացի և ուկրաինացի պաշտոնյաների աղբյուրները։

Նրանց տվյալներով՝ կոնտինգենտի հիմքը կարող է կազմել հինգից ութ երկրների կոալիցիան, այդ թվում՝ Գերմանիան, Ֆրանսիան, Իտալիան, Մեծ Բրիտանիան և Լեհաստանը։

Վերլուծաբաններն ու պաշտոնյաները կարծում են, որ անձնակազմի ճշգրիտ թիվը կախված կլինի առաքելության բնույթից, որը ներկայումս ԵՄ քննարկումների կիզակետում է: Գործակալության կողմից հարցված փորձագետների կարծիքով՝ զորքերի թիվը կարող է լինել 40 հազարից մինչև 100 հազար մարդ։

Գործակալության աղբյուրները նշում են, որ եվրոպական երկրները դեռ չեն որոշել՝ դա կլինի հրադադարի պահպանումն ապահովող խաղաղապահ զորախումբ, թե հակառուսական բնույթի «զսպող ուժ»։ Ըստ նրանց՝ Իտալիայի իշխանությունները կողմ են առաքելության խաղաղապահ բնույթին, մինչդեռ Ֆրանսիան և Ուկրաինան պնդում են «զսպման» մասին։