ԱՄՆ-ում կնոջը գենետիկորեն մոդիֆիկացված խոզի երիկամ են փոխպատվաստել

ԱՄՆ-ում Ալաբամայի բնակչուհուն հաջողությամբ փոխպատվաստել են գենետիկորեն մոդիֆիկացված խոզի երիկամ: Այս մասին, Lenta-ի փոխանցմամբ, գրում է The Washington Post-ը։

53-ամյա Թովանա Լունին իր երիկամը նվիրաբերել էր մորը՝ փոխպատվաստման համար, 25 տարի առաջ: Սակայն ութ տարի առաջ նրա մոտ էլ է սկսել զարգանալ երիկամային անբավարարություն՝ ծննդաբերությունից հետո առաջացած բարդությունների պատճառով։ Այդ ժամանակվանից ի վեր Լունին հեմոդիալիզ է ստանում։

Նոյեմբերի 25-ին Նյու Յորքի Langone Health կլինիկայում նա 10 գենետիկ փոփոխություններով խոզի երիկամի փոխպատվաստման վիրահատության է ենթարկվել: Երկու շաբաթ անց Լունին դուրս է գրվել հիվանդանոցից և այժմ ապրում է Նյու Յորքում՝ բժիշկների հսկողության ներքո։ «Ես պարզապես հիացած եմ, ես իսկապես չգիտեմ, թե ինչով զբաղվել: Ես լի եմ էներգիայով, ունեմ ախորժակ, որը չունեի ութ տարի»,- իր տպավորություններով կիսվել է նա։