Սա իսկապես լավագույն փորձառությունն էր՝ ավելի կոփվելու․ ՔՊ–ական նախկին պատգամավոր

Հրապարակումներ 18 Դեկտեմբեր, 2024 23:07

ՔՊ արդեն նախկին պատգամավոր Դավիթ Առուշանյանը Ֆեյսբուքի իր էջում գրառում է կատարել՝ անդրադառնալով պատգամավորական գործունեությունը դադարեցնելուն․

«Հարգելի՛ հայրենակիցներ,

ինչպես արդեն գիտեք՝ դադարեցնում եմ պատգամավորական գործունեությունս 8-րդ գումարման Ազգային ժողովում։

Այս տարիների ընթացքում ձգտել եմ իմ գիտելիքն ու փորձը օգտագործել միայն մեր երկրի շահի ու առաջընթացի համար։ Տեսել եմ նաև իմ գործընկերների արդար ու ազնիվ ձգտումը՝ համատեղ ջանքերով, միասին լավ գործ անելու։

Ուզում եմ իմ խորին երախտագիությունը հայտնել Ազգային ժողովի նախագահ Ալեն Սիմոնյանին, «Քաղաքացիական պայմանագիր» խմբակցության ղեկավար Հայկ Կոնջորյանին, Տնտեսական հարցերի մշտական հանձնաժողովի նախագահ Բաբկեն Թունյանին, բոլոր պատգամավոր գործընկերներիս, ԱԺ աշխատակազմին:

Սա իսկապես լավագույն փորձառությունն էր՝ ավելի կոփվելու, լավագույն հնարավորութուն էր՝ ներդրում ունենալու երկիրը շենացնելու գործում:

Գիտեմ և վստահ եմ, որ գործընկերներս իրենց ճակատում անելու են առավելագույնը՝ մեր երկրի ապագայի համար։

Ուզում եմ նաև շնորհակալություն հայտնել մեր քաղաքական թիմին վստահած բոլոր քաղաքացիներին»։

Հիշեցնենք՝ Կառավարության՝ դեկտեմբերի 12-ի նիստում հայտնի դարձավ, որ Շիրակի մարզպետ Մուշեղ Մուրադյանն աշխատանքից ազատման դիմում է գրել:

Մինչ այդ էլ ԱԺ «Քաղաքացիական պայմանագիր» խմբակցության պատգամավոր Դավիթ Առուշանյանը վայր էր դրել պատգամավորական մանդատը։

Վարչապետ Նիկոլ Փաշինյանը դեկտեմբերի 13-ին, ընդունելով Գյումրիում անցկացված փրայմերիզի մասնակիցներին, հայտնել էր, որ որոշել է Կառավարությանը ներկայացնել Դավիթ Առուշանյանի թեկնածությունը՝ որպես Շիրակի մարզպետ: