Ո՞ր մթերքները չի կարելի համադրել ալկոհոլի հետ

Ամանորյա և այլ տոնական սեղաններին ավելի լավ է ալկոհոլային խմիչքները չհամադրել որոշ մթերքների հետ, զգուշացրել է գաստրոէնտերոլոգ Վալերիա Լոմովան։ Նա Gazeta.ru-ի հետ զրույցում նշել է ամենավտանգավոր համադրությունները։

Բժիշկը խորհուրդ է տվել ալկոհոլը չզուգակցել մրգերի ու քաղցրավենիքի հետ։ Նա բացատրել է, որ մրգերը պարունակում են ֆրուկտոզա, որը ալկոհոլի հետ համակցվելիս բացասաբար է անդրադառնում ենթաստամոքսային գեղձի և լյարդի վրա: Բացի այդ, քաղցր պարունակող ալկոհոլային ըմպելիքը կարող է բարձրացնել արյան մեջ գլյուկոզայի մակարդակը, ինչը հատկապես վնասակար է ինսուլինառեզիստենտականություն, շաքարախտ և ավելորդ քաշ ունեցող մարդկանց համար:

Բացի այդ, գաստրոէնտերոլոգը խորհուրդ չի տվել ալկոհոլը համադրել աղի մթերքների հետ, քանի որ մեծ քանակությամբ աղը կարող է հանգեցնել այտուցի, ինչպես նաև մեծացնել երիկամների և սրտի ծանրաբեռնվածությունը, ինչը վտանգավոր է հիպերտոնիա ունեցող մարդկանց համար։ Իր հերթին, կծու նախուտեստներն ալկոհոլի հետ համատեղ կարող են բացասաբար ազդել աղեստամոքսային տրակտի լորձաթաղանթի վրա և առաջացնել բորբոքում, հավելել է Լոմովան։

«Ալկոհոլի հետ համադրությամբ տապակած միսը նույնպես կարող է վտանգավոր լինել»,- ասել է գաստրոէնտերոլոգը։ Այս մթերքի չարաշահումը հրահրում է քաշի ավելացում, իսկ ալկոհոլի հետ միասին բացասաբար է անդրադառնում լյարդի և ենթաստամոքսային գեղձի աշխատանքի վրա։

Լոմովան նաև խորհուրդ է տվել չխառնել տարբեր տեսակի ալկոհոլը և խուսափել շատ շաքար պարունակող կոկտեյլներ խմելուց։ «Բացի այդ, ավելի լավ է ալկոհոլն ու գազավորված ըմպելիքները չխառնել, քանի որ դրանք կարող են արագացնել հարբեցումը»,- եզրափակել է նա։