ՀՀ-ն պետք է դադարի «սեքընդհենդ» ապրանքների արտահանման հիմնական ուղղություն դառնալ․ Փաշինյան (տեսանյութ)

ՀՀ-ն պետք է դադարի «սեքընդհենդ» ապրանքների արտահանման հիմնական ուղղություն դառնալ: Այս մասին այսօր` Կառավարության նիստին ասաց վարչապետ Նիկոլ Փաշինյանը:

«Դա անթույլատրելի է և ուղիղ հակասում է այն տրամաբանությանն ու գաղափարախոսությանը, որն իրագործում ենք: Ես դեմ եմ բոլոր նման դեպքերում որևէ կարգի օգնություն, աջակցություն ստանալուն: Նույնիսկ եթե եկել է ՀՀ, մաքսատանը կանգնած է, ոչինչ, թող մաքսատնից հետ տանեն: Աշխարհում այնքան երկրներ կան, որ դրա կարիքն ունեն, և իրենց համար խնդիր չէ այդ օգտագործած, մաշած, կիսափչացած ապրանքները... Ով դրա կարիքն ունի, թող ուղարկեն այնտեղ: ՀՀ այդպիսի ապրանք չմտնի՛: ՊԵԿ-ին ևս հրապարակային ասում եմ՝ նման դեպքեր չլինեն, եթե առանձնահատուկ դեպքեր կան, ապա ինձ անպայման զեկուցեք»,- նշեց նա:

Փոխվարչապետ Տիգրան Խաչատրյանն արձագանքելով Փաշինյանի հանձնարարականին ասաց, թե այդ հարցում հետևողական են եղել. «Եղել են տարբեր համայնքներից դիմումներ, երբ բեռն արդեն հասել է, բայց խնդրել ենք վերադարձնել, որովհետև մենք նման ձևով որոշում տարուց ավելի է չենք կայացնում»,- ասաց փոխվարչապետը:

Փաշինյանը ավելացրեց, թե եղել են ժամանակներ, երբ ՀՀ-ի համար դա կարևոր է եղել, բայց այդ էջը փակված է. «Կարծում եմ` այդ էջը պետք է փակված համարենք, բարեգործության մասին նոր օրենք պետք է ընդունենք, որտեղ շատ հստակ և խիստ տրամաբանություն կլինի և բարեգործություն ասածը մեր երկրում պետք է ունենա այն իմաստը, ինչ առաջավոր և զարգացած երկրներում է»,- ասաց Նիկոլ Փաշինյանը: