Չեմ հասկանում՝ ինչու ենք որոշումներն այսպես կայացնում, ոնց որ մարդկանց ներվայնացնենք․ Փաշինյան (տեսանյութ)

Առաջնային խնդիրը շենքերը քանդելն է, որովհետև մարդիկ շարունակում են այդ շենքերի մեջ ապրել: Այս մասին այսօր` կառավարության նիստի ժամանակ նշեց վարչապետ Նիկոլ Փաշինյանը՝ անդրադառնալով Տավուշի ու Լոռու մարզերում հեղեղումների հետեւանքով վթարային դարձած շենքերի ճակատագրին:

«Այդ շենքերի վիճակը վատանում է, ինչը ռիսկ է առաջացնում, որ մի օր դրանցում որևէ բան կարող է տեղի ունենալ: Աստված չանի, կլինեն խնդիրներ, տուժածներ, հետո հարց կառաջանա` ու՞ր էր նայում կառավարությունը, մարզպետարանը, փրկարար ծառայությունը»,- նշեց Փաշինյանը:

Անդրադառնալով Լոռիում ջրհեղեղից տուժած քաղաքացիների փոխհատուցումներին` Էկոնոմիկայի նախարար Գևորգ Պապոյանը նշեց, որ 80%-ից ավելիի փոխհատուցումները փոխանցված են:

Ինչ վերաբերում է մյուսներին, ապա Պապոյանն ասաց` քանի որ քաղաքացիները հաճախ ոչ թե հաշվեհամարն են ուղարկում, այլ բանկային քարտի համար, հետևաբար խնդիրներ են առաջացնում։

Պատասխանը բարկացրեց Փաշինյանին. «Որոշումներ կայացնելիս, չեմ հասկանում էլի, ի՞նչն է մեզ տենց առաջնորդում։ Չէ՛, պետք է հաշվեհամար տալ. հաշվեհամարը չեղավ, չենք տա։ Գնա, դիմում գրի, հերթ կանգնի, պտտվի, արի Երևան, հետ գնա Ալավերդի, ճանապարհին մի հատ էլ Սևանի միասնական սոցիալական ծառայություն մտի, Իջևանում՝ զինկոմիսարիատ, Բերդում՝ ոստիկանության բաժին, Նոյեմբերյանում՝ դատախազություն․․․

Չեմ կարողանում հասկանալ, թե այս որոշումները ինչու ենք էսպես կայացնում։ Ոնց որ մարդկանց ներվայնացնենք  և ինչպես տեսնում եք ոչ միայն մարդկանց»,- ասաց Փաշինյանը։