Պուտինը ծրագրում է հանդիպել Մոսկվա ժամանած Ասադի հետ

ՌԴ նախագահ Վլադիմիր Պուտինը հայտարարել է, որ դեռ չի հանդիպել Մոսկվայում գտնվող Բաշար ալ-Ասադի հետ, սակայն ծրագրում է դա անել, հաղորդում է «Ինտերֆաքսը»։

«Ես դեռ չեմ հանդիպել նախագահ Ասադի հետ նրա ժամանումից հետո, բայց ծրագրում եմ դա անել», - ասել է նա՝ պատասխանելով համապատասխան հարցին։

Նա ամերիկացի լրագրողին խոստացել է, որ պատրաստ է Ասադին ու սիրիական նոր իշխանությունների ներկայացուցիչներին հարցնել 12 տարի առաջ այդ երկրում անհետացած լրագրող Օսթին Թայսի ճակատագրի մասին։ Լրագրողի մայրը Պուտինին նամակ է ուղարկել՝ խնդրելով Ասադի միջոցով պարզել որդու ճակատագիրը։

«Ես և դուք չափահաս մարդ ենք, և մենք հասկանում ենք, որ 12 տարի առաջ Սիրիայում մարդ է անհետացել։ Մենք հասկանում ենք, թե ինչ իրավիճակ էր այնտեղ, երկու կողմից էլ ակտիվ ռազմական գործողություններ էին», - նշել է ՌԴ նախագահը և հավելել, որ չի կարծում՝ Ասադն ինքը գիտի անհետացած լրագրողի մասին։