ՆԳՆ-ն հայտարարում է Պարեկային ծառայության համալրման ընդունելություն

Ներքին գործերի նախարարությունը ոստիկանության բարեփոխումների շրջանակում հայտարարում է ընդունելություն Պարեկային ծառայության թափուր տեղերի համալրման նպատակով։ Ընդունելության համար կարող են դիմել Հայաստանի Հանրապետության այն քաղաքացիները, որոնք բավարարում են մի շարք պահանջների։

Դիմորդները պետք է ունենան առնվազն միջնակարգ կրթություն, լինեն 18-35 տարեկան, ունենան 155 սմ-ից ոչ պակաս հասակ և համապատասխանեն առողջական ու ֆիզիկական պատրաստվածության պահանջներին։

ՆԳՆ-ն առանձնահատուկ կարևորում է կանանց ներգրավվածությունը ծառայությունում, նշելով, որ կին ծառայողները դրական ազդեցություն ունեն հասարակության հետ շփման արդյունավետության վրա։ Այս նպատակով թափուր տեղերի մեծամասնությունը նախատեսված է իգական սեռի ներկայացուցիչների համար։

Ոստիկանության ծառայող չհանդիսացող անձանց համար ուսուցումը կանցկացվի «Ոստիկանական գործ» մասնագիտության «Պարեկ» որակավորմամբ՝ պետական պատվերի շրջանակներում։ Ուսման ավարտին շրջանավարտներին շնորհվում է ոստիկանության կոչում, և նրանք նշանակվում են ՆԳՆ պարեկային ծառայությունում։

Ոստիկանության գործող ծառայողները նույնպես կարող են դիմել մրցույթին և մասնակցել լրացուցիչ կրթական ծրագրի՝ իրենց որակավորումը բարձրացնելու համար։ Ուսման տևողությունը 6 ամիս է։

Փաստաթղթերն ընդունվում են 2024 թվականի դեկտեմբերի 16-ից 2025 թվականի հունվարի 17-ը ներառյալ՝ աշխատանքային օրերին։ Դիմորդները պետք է այցելեն ՀՀ ՆԳՆ կրթահամալիր (ք. Երևան, Ծովակալ Իսակովի պողոտա 29)՝ ժամը 09։00-ից 13։00-ն և 14։00-ից 16։00-ն։

Ընդունելության ստուգումներն ու հարցազրույցները կանցկացվեն 2025 թվականի մարտի 3-ից ապրիլի 18-ը։