Առուշանյանի վերաբերյալ որոշումը կհրապարակվի մոտ օրերս. Hraparak.am

Hraparak.am-ը գրել է.

Վերաքննիչ դատարանը դեկտեմբերի 26-ին  հրապարակելու է Գորիսի քաղաքապետ Առուշ Առուշանյանի գործով որոշումը։ Հիշեցնենք՝ թե դատախազությունը, թե պաշտպանական կողմը բողոքարկել էին առաջին ատյանի դատավոր Վարսենիկ Մելքոնյանի որոշումը։

Առուշանյանի պաշտպաններից Սերգեյ Մարաբյանը «Հրապարակ»-ի հետ զրույցում ասաց, որ բողոքը քննվել է գրավոր ընթացակարգով, դատավորը եղել է Մնացական Հարությունյանը։

Փաստաբանը նշեց, որ դատախազությունը պահանջում է Վերաքննիչ դատարանից ամբողջական պատիժ նշանակել․ «Վեց ամսից ավելի մաս կա որոշման մեջ, որը պայմանականորեն չի կիրառվել, դատախազությունը ուզում է, որ այդ պայմանական չկիրառված  մասը վերացվի եւ գումարվի այս փոփոխված պատժի չափին։ Մենք գտնում ենք, որ այստեղ կա օրենքի հետադարձ ուժի հետ խնդիր, եւ կարծում ենք՝ իր վրա պետք է տարածվի այն օրենքները, որոնք գործել են հանցանք կատարելու պահին, իսկ այն օրենսգրքով որեւէ հնարավորություն չկար որեւէ պատիժ փոխելու»։

Հիշեցնենք, որ սեպտեմբերի սկզբին դատարանը Գորիսի քաղաքապետի դատավճիռը փոխեց եւ հետաձգված պատիժն ու պաշտոնավարումը 5 տարով դադարեցնելու փոխարեն նրան դատապարտեց 1 տարի 8 ամիս ազատազրկման։ 33-ամյա Առուշ Առուշանյանը բանտ կտեղափոխվի, երբ որոշումն ուժի մեջ մտնի, այսինքն` երբ անցնի մյուս դատական ատյաններով։

Գորիսը 7 տարի կառավարող քաղաքապետը դեռ 2022-ին էր մեղավոր ճանաչվել պաշտոնեական լիազորությունները չարաշահելու, ինքնիրավչության եւ դիտավորությամբ առողջությանը վնաս պատճառելու համար։ Դատավճիռն ուժի մեջ էր մտել այս տարվա հուլիսին։ Նրան 5 տարի ժամկետով արգելվել է զբաղեցնել համայնքապետի պաշտոնը։ Պրոբացիայի ծառայությունը դիմել էր Գորիսի ավագանուն, որ քաղաքապետի լիազորությունները դադարեցվեն, ավագանին հրաժարվել էր պաշտոնանկ անել քաղաքապետին, հիմնավորել էր, որ նման լիազորություն չունի։ Դրանից հետո Պրոբացիայի ծառայությունը դիմեց դատարան, պահանջելով Առուշանյանի՝ 5 տարով պաշտոնը թողնելու պատիժը փոխարինել ազատազրկմամբ։