Թրամփը սպառնացել է վերադարձնել Պանամայի ջրանցքը

ԱՄՆ նորընտիր նախագահ Դոնալդ Թրամփը Պանամայի ջրանցքի ադմինիստրացիայից պահանջել է նվազեցնել այս ջրային ճանապարհով անցնող նավերի համար վճարները, հակառակ դեպքում՝ Վաշինգտոնը կարող է վերականգնել վերահսկողությունն այս օբյեկտի նկատմամբ, հաղորդում է «Ինտերֆաքսը»։

«Միացյալ Նահանգները շահագրգռված է Պանամայի ջրանցքի անվտանգ և արդյունավետ շահագործման մեջ, և դա միշտ էլ հասկացվել է: Մենք երբեք թույլ չենք տա, որ այն հայտնվի սխալ ձեռքերում։ Դա տրվել է ոչ թե ի շահ ուրիշների, այլ պարզապես որպես մեր ու Պանամայի հետ համագործակցության նշան։ Եթե ​​նվիրատվության այս առատաձեռն ժեստի սկզբունքները, բարոյական և իրավական սկզբունքները չհարգվեն, ապա մենք կպահանջենք, որ Պանամայի ջրանցքը մեզ վերադարձվի ամբողջությամբ և առանց կասկածի։ Պանամայի պաշտոնյաներին խնդրում եմ գործել համապատասխան կերպով»,-նշված է Truth Social հարթակում Թրամփի գրառման մեջ:

«Երբ ԱՄՆ նախագահ Ջիմի Քարթերը հիմարաբար տվեց այն՝ մեկ դոլարի դիմաց, միայն Պանաման կարող էր շահագործել ջրանցքը, ոչ Չինաստանը կամ որևէ ուրիշը: Նմանապես, Պանաման իրավունք չուներ ապօրինի գներ և նավերի անցման ծավալներ սահմանել Միացյալ Նահանգների, ռազմածովային նավատորմի և ամերիկյան տարածքում բիզնես անող կորպորացիաների համար»,- շարունակել է Թրամփը։

Նա ընդգծել է, որ անհրաժեշտ է ապահովել Պանամայի ջրանցքի հուսալիությունը, քանի որ այն կարևոր դեր է խաղում Միացյալ Նահանգների անվտանգության և տնտեսության համար։ Թրամփը խոստացել է, որ ջրանցքը երբեք «սխալ ձեռքերում չի հայտնվի»։