Եթե մենք չավելացնենք պաշտպանական ծախսերը, լուրջ խնդիրներ կունենանք․ Ռյուտե

ՆԱՏՕ-ի գլխավոր քարտուղար Մարկ Ռյուտեն ընդգծել է պաշտպանական ծախսերն ավելացնելու, պաշտպանական արդյունաբերության հզորացման և արտադրությունն ընդլայնելու անհրաժեշտությունը՝ ընդունելով, որ դաշինքը չի արտադրում բավականաչափ ռազմական արտադրանք՝ երկարաժամկետ պաշտպանվելու համար, գրում է ՏԱՍՍ-ը։

«Եթե մենք չավելացնենք պաշտպանական ծախսերը, ապա 4-5 տարի հետո լուրջ խնդիրներ կունենանք», ասել է Ռյուտեն: Սակայն նա չի հավատում, որ Ռուսաստանը ներկայումս իբր ի վիճակի է հարձակում սկսել դաշինքի տարածքի վրա։ «Մենք հիմա վախենալու կարիք չունենք, բայց երկարաժամկետ հեռանկարում ես անհանգստացած եմ», - ասել է ՆԱՏՕ-ի գլխավոր քարտուղարը:

Նրա կարծիքով, Հյուսիսատլանտյան դաշինքի երկրները դեռ բավարար միջոցներ չեն ձեռնարկում Ռուսաստանում սպառազինության արտադրության լայնածավալ ընդլայնմանը դիմակայելու համար։ «Մենք պետք է ուժեղացնենք պաշտպանական արդյունաբերությունը և ընդլայնենք արտադրությունը: Մենք պետք է կազմակերպենք լրացուցիչ հոսքագծեր և հերթափոխեր, քանի որ մենք չենք արտադրում բավականաչափ ռազմական արտադրանք երկարաժամկետ հեռանկարում մեզ պաշտպանելու համար», հավելել է Ռյուտեն: «Մենք դեռ ժամանակ ունենք նախապատրաստվելու և ուժեղացնելու մեր զսպողությունը՝ ՆԱՏՕ-ի տարածքում պատերազմը կանխելու համար: Բայց մենք պետք է գործենք հիմա», - պնդում է նա: