Թուրքիայի ցամաքային զորքերի հրամանատարը ժամանել է Բաքու

Ադրբեջանի պաշտպանության նախարար Զաքիր Հասանովն ընդունել է պաշտոնական այցով Ադրբեջանում գտնվող Թուրքիայի ցամաքային զորքերի հրամանատար, բանակի գեներալ Սելչուք Բայրաքթարօղլուի գլխավորած պատվիրակությանը։ Այս մասին հայտնում են ադրբեջանական ԶԼՄ–ները։

ՊՆ–ում կայացած հանդիպման ժամանակ Հասանովն ընդգծել է Ադրբեջանի և Թուրքիայի երկկողմ ռազմական համագործակցության բարձր մակարդակը։ Ադրբեջանցի նախարարը կարևորել է «Շուշիի հռչակագրի» կատարման հետ կապված միջոցառումների իրականացումը, «որն արտացոլում է երկու եղբայրական պետությունների ղեկավարների բարեկամական հարաբերությունները»։ Հասանովը նաև ընդգծել է «Ադրբեջանի և Թուրքիայի միջև ռազմավարական գործընկերության դերը տարածաշրջանում խաղաղության և կայունության ապահովման գործում»։

Բացի այդ, հանդիպմանը քննարկվել են ռազմական և ռազմակրթական ոլորտներում երկկողմ համագործակցության զարգացման հեռանկարները։ Կողմերն անդրադարձել են նաև երկկողմ հետաքրքրություն ներկայացնող մի շարք այլ հարցերի։