Ռուսաստանում խարդախներ են գործում, որոնք օգտագործում են NGate banking Trojan ծրագրի նոր տարբերակը

Չարագործները սկսել են օգտագործել NGate banking Trojan ծրագրի նոր տարբերակը՝ ռուսաստանցի օգտատերերին խաբելու համար, հայտնում է Коммерсант-ը։

Ինչպես պարզաբանել են ՌԴ ՆԳՆ տեղեկատվական և հեռահաղորդակցության տեխնոլոգիաների անօրինական օգտագործման դեմ պայքարի կազմակերպման վարչությունում, ծրագիրը քաղում է տվյալները բանկային քարտից և այն ուղարկում չարագործներին:

Գերատեսչությունը զգուշացրել է, որ խաբեբաները զանգահարում են իրենց զոհերին՝ սոցիալական նպաստ ստանալու կամ այլ ֆինանսական շահ ստանալու պատրվակով։ Դրանից հետո խնդրում են հետևել հղմանը, որը ներբեռնում է NGate-ի տեղադրման ֆայլը, որը քողարկված է որպես  Ռուսաստանի բանկի, հայտնի բանկերի  կամ «Պետական ծառայություններ» պորտալի հավելված:

Երբ օգտատերը գործարկում է հավելվածը, նրան խնդրում են սմարթֆոնի հետևի մասում տեղադրել վճարային քարտ և մուտքագրել PIN կոդը՝ իբր հաճախորդին ստուգելու համար։ Այնուհետև զոհին խնդրում են սպասել քարտի ճանաչմանը, բայց այդ պահին տրոյականը քաղում է տվյալները քարտից և փոխանցում դրանք խաբեբաներին: Միաժամանակ չարագործները բանկոմատից կանխիկ գումար են հանում։

Այս շաբաթվա ընթացքում Ռուսաստանի կառավարությունը որոշում է ընդունել, որը սահմանափակում է ինտերնետով զանգերը IP հեռախոսակապի միջոցով։ Որոշումը նպատակ ունի ուժեղացնել հեռախոսային խարդախության դեմ պայքարի միջոցները։

Միևնույն ժամանակ, ՌԴ թվային նախարարությունը պարզաբանել է, որ փաստաթուղթն արգելում է որոշակի տեսակի լիցենզիա, որը թույլ է տալիս IP զանգերը ներկայացնել որպես սովորական զանգեր բջջային կամ քաղաքային հեռախոսից: Սահմանափակումն ուժի մեջ կմտնի 2025 թվականի սեպտեմբերից։

Աղբյուր` news.am