Հարավային Կորեայում չեն կարողացել ձերբակալել նախագահին

Հարավային Կորեայում փորձել են ձերբակալել նախագահ Յուն Սեոկ Յոլին, ով հեռացվել է իշխանությունից, սակայն դա կանխվել է քաղաքական գործչի անվտանգության աշխատակիցների կողմից։ Արդյունքում՝ որոշվել է կասեցնել ձերբակալության որոշման կատարումը, հայտնում է Yonhap-ը

Հունվարի 3-ին Հարավային Կորեայի հակակոռուպցիոն գործակալության քննիչները փորձել են կալանավորել երկրի՝ նախկինում պաշտոնանկ արված նախագահ Յուն Սեոկ Յոլին։ Նրա ձերբակալման օրդեր է տրվել մի քանի օր առաջ՝ քաղաքական գործչի՝ ռազմական դրություն մտցնելու փորձի համար ապստամբության և իշխանությունը չարաշահելու մեղադրանքով։

Սակայն Յունին կալանավորելու փորձն անհաջող է անցել նրա մոտ հազար հոգանոց կողմնակիցների բողոքի ակցիաների, ինչպես նաև նախագահական գվարդիայի հետ առճակատման պատճառով։ Քննիչները հրաման են տվել, սակայն անվտանգության աշխատակիցները հրաժարվել են մուտք գործել բնակավայր՝ պատճառաբանելով պահպանվող տարածքի ռեժիմը։

Պաշտոնապես կալանքի որոշումը պետք է կատարվի մինչև հունվարի 6-ը, սակայն որոշվել է կասեցնել այդ ընթացակարգը։

«Մեր գնահատմամբ՝ համառ հակազդեցության պատճառով՝ հրամանի կատարումը գրեթե անհնար է լինելու։ Ընթացակարգը կասեցվել է՝ ելնելով աշխատակիցների անվտանգային մտահոգությունից»,- հայտնել է Հարավային Կորեայի հակակոռուպցիոն գործակալությունը՝ խոստանալով իրավիճակը վերլուծելուց հետո որոշում կայացնել հետագա գործողությունների մասին։