Մասկը վճարովի է դարձնում X սոցիալական ցանցում գրանցումը

Իլոն Մասկի X սոցիալական ցանցը կսկսի գումար գանձել օգտատերերի գրանցման համար։ Այս մասին հայտնում է Fortune-ը։

X-ի գրանցումը դեռևս անվճար է, սակայն ԶԼՄ-ների տեղեկությունների համաձայն՝ առաջիկա ամիսներին դա կարող է փոխվել: Սոցցանցը մտադիր է յուրաքանչյուր նոր օգտատիրոջից հաշիվ ստեղծելու համար գանձել 8 դոլար: Ակնկալվում է, որ նորամուծությունն ամբողջ աշխարհում կներկայացվի 2025 թվականի փետրվարին։

Այն օգտատերը, ով չվճարի գրանցման համար, չի կարողանա գրառումներ անել կամ մեկնաբանել ուրիշների գրառումները։ Նրան հասանելի կլինի միայն կարդալու ռեժիմը: Որպես վճարովի գրանցման բոնուս՝ օգտատերերին կտրվի ամսական X Premium բաժանորդագրություն, որն առանձին արժե 8 դոլար: Այն հեռացնում է գովազդը և ընդլայնում է ներկառուցված Grok նեյրոնային ցանցի հնարավորությունները։

Նշվում է, որ X-ն այս քայլին դիմել է կեղծ աքաունթների ու բոտերի դեմ պայքարելու համար։ Նորարարությունը փորձարկվում է 2023 թվականից՝ Նոր Զելանդիայում և Ֆիլիպիններում, որտեղ օգտատերերը պետք է տարեկան 1 դոլար վճարեն՝ սկսած գրանցումից, հակառակ դեպքում սոցցանցը հասանելի կլինի միայն կարդալու ռեժիմով։