Պետք է մեր հարևանների միջավայրում ապրելու հնարավորություն ունենանք՝ առանց արտաքին օգնության և միջամտության. Փաշինյան

Հայաստանի վարչապետ Նիկոլ Փաշինյանը հայտարարել է, որ Հայաստանի հարատևությունը հնարավոր կլինի ապահովել այն դեպքում, երբ կստեղծվի մի իրավիճակ, երբ Հայաստանը իր հարևանների միջավայրում կկարողանա ապրել առանց արտաքին օգնության և միջամտության։ Այս մասին վարչապետն այս մասին ասել է ԱՄՆ հայ համայնքի ներկայացուցիչների հետ հանդիպման ժամանակ։

Փաշինյանի խոսքով, բավականին երկար ժամանակ ՀՀ իշխանությունները իրենց առջև դրել են Հայաստանի հարատևության ապահովման հարցը։ «Իմ գնահատմամբ՝ մենք դա կանենք, եթե կարողանանք ստեղծել մի իրավիճակ, որ մենք մեր տարածաշրջանում, մեր հարևանների միջավայրում կկարողանան ապրել առանց արտաքին օգնության։

«Սա չի նշանակում, որ մենք տարբեր դաշինքներ, համագործակցություններ ամենատարբեր աշխարհաքաղաքական կենտրոնների հետ չպետք է ունենանք։ Խոսքը դրա մասին չէ, խոսքը նրա մասին է, որ մենք պետք է խնդիր դնենք մեր տարածաշրջանում ունենալ ապրելու հնարավորություն առանց արտաքին օգնության և առանց արտաքին միջամտության։ Դրա համար մեր ընկալումն այն է, որ մենք պետք է ինքներս մեզ ընկալենք որպես մեր խնդիրների լուծման առաջին գործոն։  Երբ մենք խնդիր ենք ունենում մեր տարածաշրջանում, սովորաբար մեր միջին վիճակագրական արձագանքն այն է, որ դիմենք այստեղ, դիմենք այնտեղ, դիմենք  արտատարածաշրջանային ինչ-որ գործոնի։ Սա ուրիշի մասին չէ, սա մեր մասին է, ընդ որում, հասկանալի է, թե ինչու ենք մենք այսպես վարվել, բայց, անկախ դրանից, կարծում եմ, որ մենք պետք է մեր դիտանկյունը փոխենք և ասենք, որ եթե մենք խնդիր ունենք մեր տարածաշրջանում, մենք ինքներս մեզ պետք է առաջինն ընկալենք որպես այդ խնդրի լուծման սուբյեկտ, և մեր առաջին ռեակցիան չպետք է լինի, թե որտեղ կա մի ուժ, որ մենք կարող ենք գնալ դիմել, որպեսզի այդ խնդիրը լուծվի»,- ասել է Փաշինյանը։