Մարմնի որ հատկանիշները կարող են հանգեցնել մահվան քնի ժամանակ. բացատրում է բժիշկը

Սարսափելի պատմությունները, որոնք տարածվում են համացանցում քնի մեջ մահվան մասին, պարզապես հորինվածք չեն։ Այն, ինչ կարող է «սպանել» գիշերը, երբեմն ցերեկը ոչ մի կերպ չի դրսևորվում։

Այո, խռմփոցը հաճախ կապված է հիվանդությունների, ճարպակալման, շնչառական խնդիրների (հիմնականում քթի), ինչպես նաև փափուկ քիմքի անատոմիական առանձնահատկությունների, բերանի խոռոչում առկա տարբեր գոյացությունների և ստորին ծնոտի կառուցվածքի հետ, – ասում է «Ինվիտրո» ընդհանուր պրակտիկայի մասնագետ Ելենա Ալեքսենցևան «Ստրաստի» պորտալին։

Մասնագետը բացատրում է, որ խռմփոցն առաջանում է փափուկ քիմքի և քիմքային լեզվակի թրթռման հետևանքով․ դրանք տատանվում են ու հարվածում լեզվի հետին մասին և վերին շնչուղիների պատերին՝ առաջացնելով այդ բնորոշ ձայնը։ Նրա խոսքով, այս երևույթը կարող է լուրջ բժշկական խնդիր լինել և նույնիսկ վտանգ սպառնալ կյանքի համար։

«Խռմփոցի ամենավտանգավոր բարդությունը այն է, երբ քիմքն ու լեզուն կախվում են և փակվում՝ ամբողջությամբ փակելով շնչուղիները»,- բացատրում է Ալեքսենցևան։ Նա հավելում է, որ նման դեպքերում շնչառության դադարն ի վիճակի է տևել ավելի քան 10 վայրկյան՝ խախտելով սրտի աշխատանքը։ Որոշ դեպքերում հնարավոր է նույնիսկ շնչառության կանգ։

Բացի այդ, քնի ընթացքում շնչառական խնդիրներ կարող են առաջանալ նաև «սխալ» քնելու դիրքից։ Օրինակ, եթե մարդը քնում է մեջքի վրա՝ օգտագործելով հարթ կամ ցածր բարձ, մեծանում է լեզվի հետընթացի վտանգը, ինչը կարող է հանգեցնել ապնոեի (շնչառության կարճատև դադարեցման)։

Այնուամենայնիվ, ժամանակակից բժշկությունը տարբեր լուծումներ է առաջարկում խռմփոցից ազատվելու համար։ Գոյություն ունեն հատուկ քնային դիմակներ և նմանատիպ սարքեր, որոնք լայնացնում են շնչուղիները՝ թույլ չտալով, որ լեզվակը և քիմքը ընկնեն։

Ծայրահեղ դեպքում, այս խնդիրը կարող է շտկվել վիրաբուժական միջամտությամբ։

Թարգմանություն՝ Lurer.com-ի