Կառավարությունը պատրաստ է 2 ամսով երկարաձգել արցախցիներին տրվող 40 հազար դրամ օգնությունը

Կառավարությունը պատրաստ է 2 ամսով երկարաձգել արցախցիներին տրվող 40 հազար դրամ օգնությունը, այս մասին լրագրողներին հայտնեցին փոխվարչապետ Տիգրան Խաչատրյանի հետ հանդիպման գնացած արցախցիները։

«Կառավարությունը պատրաստ է ևս 2 ամսով 40 հազար դրամ աջակցությունը տրամադրել, ետքայլ եղել է մասնակի: 50 հազար դրամ աջակցության ծրագրի մասին խոսք լինել չի կարող: Միայն 40 հազար դրամ՝ յուրաքանչյուր անձի համար»,- նշեց Արցախցիների իրավունքների պաշտպանության խորհրդի անդամ Նժդեհ Իսկանդարյանը:

«Այս անգամ էլ ներկայացրել ենք մեր բոլոր առաջարկները, բայց, ցավոք, հարցերին ավելի երկարաժամկետ լուծումներ տալու համար մեր հիմնավորված փաստարկները չեն ընդունվել։ Իրենց առաջարկներն էլ մենք չենք ընդունել, բայց համաձայնության եզրեր եղել են։ Կառավարության նախապայմանը վրանն Ազատության հրապարակից ապամոնտաժելն է, կքննարկենք առաջիկա օրերին և կտեղեկացնենք»,–ասաց նա։