Հրանտ Բագրատյանը ջախջախիչ հաղթանակ է տարել դատարանում. «Հրապարակ»

«Հրապարակ»–ը գրում է․

«Երեք տարի  շարունակ ՀՀ նախկին վարչապետ Հրանտ Բագրատյանը դատարաններում կռիվ էր տալիս իր կենսաթոշակի համար, եւ, ահա` ապրիլի 7-ին այդ վեճը վերջնականապես հանգուցալուծվել է։ Բանն այն է, որ Գերագույն խորհրդի 1991 թվականի հոկտեմբերի 21-ի թիվ Ն-0427-I որոշման 3-րդ կետի համաձայն, Հրանտ Բագրատյանին՝ որպես նախկին բարձրաստիճան պաշտոնյայի, պետք է վճարվի հատուկ թոշակ, որը բարձր է սովորական կենսաթոշակից, սակայն Միասնական սոցիալական ծառայությունը հրաժարվում էր վճարել նախկին վարչապետին հասանելիք թոշակը։  Բագրատյանը հայցադիմում է ներկայացրել դատարան եւ պահանջել` պարտադրել Ծառայությանը նշանակել իրեն օրենքով հասանելիք թոշակը:

Պատասխանողը պնդել է, որ իրենք օրենքով են առաջնբորդվել` հայցվորին նշանակելով տարիքային կենսաթոշակ: Սակայն Վարչական դատարանը գտել է, որ հայցվորի պահանջն օրինական է եւ բավարարել էր հայցապահանջը: Հետո վերաքննիչ վարչական դատարանը բեկանել է առաջին ատյանի որոշումը` բավարարելով Սոցիալական ծառայության վերաքննիչ բողոքը: Իսկ Վճռաբեկ դատարանը երկու տարի հետո՝ ապրիլի 7-ին ՀՀ նախկին վարչապետի վճռաբեկ բողոքը բավարարել է, բեկանել է՝ վերաքննիչ վարչական դատարանի 2023 թ. դեկտեմբերի 21-ի որոշումը, օրինական ուժի մեջ թողնելով 2022 թ. օգոստոսին կայացված վարչական դատարանի որոշումը:

Այսպիսով, Հրանտ Բագրատյանը հասնելով մինչեւ Վճռաբեկ դատարան՝ հաղթել է նախարարությանը, եւ այժմ պետությունը պարտավոր է կատարել դատարանի որոշումը եւ Բագրատյանին վճարել այն կենսաթոշակը, որը հայցվոր կողմը պահանջում էր։ Ըստ ամենայնի, նման որոշումները հետադարձ ուժ ունեն եւ Բագրատյանը պետք է ստանա նաեւ նախորդ տարիների չվճարված տարբերությունը։ Բագրատյանի ներկայացուցիչը` Արթուր Տալանյանը հաստատեց տեղեկությունը, որ դատական կարգով հասել են վերջնական արդյունքի, սակայն այլ հարցերի պատասխանել հրաժարվեց»։