Փաշինյանի հանդեպ անվստահության գործընթացը քաղաքական առումով չունի արդյունավետության հեռանկար. Հակոբ Բադալյան

Դասական իմաստով, հենց այստեղ է խորհրդարանական համակարգի առավել ճկունությունը՝ իմպիչմենտի «պարզեցված» տարբերակի մեջ, ինչպես օրինակ պարզեցված հարկը հարկային վարչարարության ու տնտեսական քաղաքականության ճկունության գործիք է: Այս մասին գրել է քաղաքական վերլուծաբան Հակոբ Բադալյանը:

«Վարչապետին անվստահություն հայտնելու ճկուն գործիքի պարագայում, խորհրդարանները կարողանում են օպերատիվ փոփոխությունների ենթարկել պետական քաղաքականությունը, արագորեն արձագանքել կառավարության անարդյունավետությանը: 

Նախագահական մոդելի պարագայում չկա դրա օպերատիվ հնարավորությունը: Նախագահական մոդելն այդ իմաստով առավել ծանրաշարժ մոդել է: 

Խնդիրը բոլորովին մոդելների լավ կամ վատ լինելու համեմատությունը չէ: Ինչպես այս առումով առիթ եմ ունեցել տարբեր անգամներ, տարբեր ձեւաչափով արտահայտել կարծիքս, կառավարման մոդելների հարցում շատ հարաբերական է ճիշտն ու սխալը: Դա իսկապես գրեթե անվերջ տեսական բանավեճի առարկա է, թե որ մոդելն է նախընտրելի, այդ թվում՝ որ մոդելն է նախընտրելի Հայաստանի համար:

Իմ կարծիքն այստեղ չեմ գրում, դրա մասին էլ խոսել եմ: Ընդ որում, այդ իմաստով ժամանակի ընթացքում ես վերանայել եմ կարծիքս, բայց այդ մասին այլ առիթով:

Վերադառնալով իմպիչմենտի հարցին պրոցեսուալ իմաստով, ապա այսօր իհարկե Հայաստանի խորհրդարանում բացարձակապես բավարար են վարչապետին եւ կառավարությանն անվստահություն հայտնելու հիմքերը: Դրանք բազմաթիվ են:

Բայց, կրկնեմ, դա տեղի չի ունենում, որովհետեւ խորհրդարանական մեծամասնությունը չի գիտակցում իր պետական դերը եւ առաջնորդվում է զուտ կուսակցական «բնազդներով», համարելով, որ ինքը վարչապետի ենթական է, որ վարչապետն իրենց ղեկավարն է, այլ ոչ թե պատգամավորն է կառավարության ու վարչապետի գործունեության համար հաշվետվություն պահանջողն ու գնահատողը:

Սա է նաեւ պատճառը, որ իմ կարծիքով, խորհրդարանում Փաշինյանի հանդեպ անվստահության գործընթացը քաղաքական առումով չունի արդյունավետության հեռանկար»: