Զախարովան մատնանշել է ռուսական ռազմական ներկայության կարևորությունը Հայաստանի անվտանգության համար

Երևանում հասկանում են, որ ռուսական ռազմական ներկայությունը Հայաստանում անվտանգության ճարտարապետության կարևոր տարր է հենց երկրում և ողջ Հարավային Կովկասում։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, հաղորդում է Sputnik-ը։

«Մենք Հայաստանի տարածքից ռուսական ռազմակայանի հնարավոր դուրսբերման մասին որևէ ազդանշան Երևանից չենք ստացել։ Հանրապետության պաշտոնատար անձինք հաստատում են, այդ թվում՝ հրապարակայնորեն, որ նման հարցերը օրակարգում չեն», - ասել Է Զախարովան։ Նա ընդգծել է, որ ռուսական բազայի ներկայությունը կարգավորվում է Հայաստանի և Ռուսաստանի միջև համապատասխան երկկողմ համաձայնագրերով:

Ընդ որում, նրա խոսքով, ռազմակայանի կարգավիճակի հարցը երբեք չի բարձրացվել Ադրբեջանի հետ Ռուսաստանի փոխգործակցության համատեքստում։ «Միևնույն ժամանակ Մոսկվան տեղյակ է և հիմնավորված է համարում Բաքվի մտահոգությունը Հայաստանում ԵՄ առաքելության գործունեության վերաբերյալ: Հայտնի է, որ այդ, այսպես կոչված, առաքելության աշխատակիցները լրտեսում են Հայաստանի հարևան երկրներին, իսկ Երևանին, իհարկե, հաշվետու չեն։ Տարածաշրջանում ոչ մի կայունության նրանք չեն նպաստում», - նշել Է Զախարովան։