Հայաստանից քայլ ենք ակնկալում «Զանգեզուրի միջանցքի» վերաբերյալ․ Հաջիև

Մենք ապահովել ենք անվտանգությունն ու կայունությունը տարածաշրջանում։ Հայաստանը կարող է դառնալ համակողմանի քննարկումների և միջանցքների բաղկացուցիչ մասը։ Նման հայտարարությամբ հանդես է եկել Ադրբեջանի նախագահի օգնական Հիքմեթ Հաջիևը Պրահայում GLOBSEC Forum 2025-ի շրջանակներում, փոխանցում է APA-ն։

«Հայաստանը կարող է դառնալ տարածաշրջանում անցկացվող համակողմանի քննարկումների և միջանցքների բաղկացուցիչ մասը։ Դա հնարավոր է: Եվ մենք, բնականաբար, ակնկալիքներ ունենք Հայաստանից։ 30 տարի Հայաստանը շրջափակման մեջ էր պահում Նախիջևանը։ Իսկ հիմա մենք սպասում ենք, որ նրանք կանեն առաջին կարևոր քայլը՝ «Զանգեզուրի միջանցքի» վերաբերյալ», -  ասել է նա։

««Միջանցք» բառը նյարդայնացնում է Հայաստանի իմ գործընկերներին։ Թող կոչեն այնպես, ինչպես ուզում են: Բայց նախ մենք ուզում ենք կապ հաստատել Նախիջևանի հետ, քանի որ 30 տարվա ընթացքում մենք զրկված ենք եղել այդ հնարավորությունից։ Դրանից հետո, կարծում եմ, Հայաստանի համար էլ կարող են այլ հնարավորություններ բացվել։ Մենք ցանկանում ենք Հայաստանը տեսնել նաև տարածաշրջանային տրանսպորտի մաս», - եզրափակել է Հաջիևը։