Ռուսաստանի նավթագազային եկամուտները կտրուկ նվազել են․ բյուջեն դուրս է գալիս վերահսկողությունից

Ռուսաստանի նավթագազային եկամուտները հունիսին կազմել են ընդամենը 494,8 միլիարդ ռուբլի՝ դառնալով ամենացածրը այս տարվա հունվարից հետո։ Նախորդ ամսվա համեմատ եկամուտները նվազել են գրեթե 18 միլիարդ ռուբլով։ Նկատվել է ինչպես նավթից, այնպես էլ գազից ու գազային կոնդենսատից եկամտի անկում։

Բյուջեի փաստացի մուտքերը չհասան կանխատեսվածին՝ շեղումը կազմելով 7 միլիարդ ռուբլի, իսկ հուլիսին ակնկալվում է 25 միլիարդի պակասում։ Արժույթի ու ոսկու վաճառքից կփորձեն լրացնել այս բացը՝ վաճառելով օրական 820 միլիոն ռուբլու չափով։

Նախարարությունը պատճառը համարում է հումքի ցածր գինը։ Չնայած Մերձավոր Արևելքի կարճատև լարվածությանը, Urals տեսակի նավթի գինը մնացել է բյուջետային սահմանաչափից ցածր՝ 59,84 դոլար։ Բյուջեի լարումը ստիպում է կառավարությանը քննարկել նավթի սահմանային գնի վերանայումը 2026-ի ֆինանսական պլանում, գրում է Лента.ру-ն։