Քաղաքական գրասենյակում կազմած փաստաթուղթը դարձավ մեղադրական եզրակացություն․ Ռոբերտ Քոչարյան

Այս մեղադրական եզրակացությունը չի տրվել ի սկզբանե իրավաբանի կողմից։ Այն քաղաքական փաստաթուղթ է, որը որոշ գրասենյակներից ուղարկել են դատախազություն։ Սա, ըստ էության, քաղաքական գրասենյակներում կազմված փաստաթուղթ է, որը շատ փոքրիկ փոփոխություններով դարձավ մեղադրական եզրակացություն։ Այս մասին դատարանում հայտարարեց ՀՀ երկրորդ նախագահ Ռոբերտ Քոչարյանը։

Անդրադառնալով մեղադրական եզրակացության մեջ որպես շարժառիթ իրեն վերագրվող գործողություններում «ցանկալի իշխանական համակարգը պահելը» և «ամեն գնով իշխանությունն իր մտերիմ Սերժ Սարգսյանին փոխանցելը» ձևակերպումներին՝ նա նշեց․

«Երբ մեղադրանքն առաջադրեցին, ես քննիչին ասացի՝ չեմ հասկանում՝ ի՞նչ եք ուզում ինձանից։ Մինչ այսօր ես այդ բացատրությունը չեմ ստացել։ Հիմա խնդրում եմ, ինձ բացատրեք, ի՞նչ է նշանակում ցանկալի իշխանական համակարգ։ Փորձել եմ գրականություն քրքրել, նույնիսկ դիմել եմ արհեստական բանականությանը»,-ասաց Քոչարյանը՝ հավելելով, որ երկրի ղեկավարի սահմանդրական սուրբ պարտականությունն է իշխանական համակարգի պահպանումը, որը պետական ինստիտուտների ամբողջությունն է։

«Ստացվում է, որ ինձ մեղադրում են այն բանի մեջ, ինչը իմ պարտականությունն է»,-նշեց նախկին նախագահը։

Քոչարյանը նաև հայտարարեց, որ փորձել է հասկանալ ո՞վ է Սերժ Սարգսյանը մեղադրական եզրակացության մեջ․

«Չկա՛, չի նշված։ Չի նշված, թե ով է Սերժ Սարգսյանն այս մեղադրական եզրակացության մեջ, հարևա՞նս է։ Ամեն ինչին չափ պետք է լինի, չէ՞։ Հարց է առաջանում, լավ, դատախազությունը չգիտեր, որ Սերժ Սարգսյանը ՀՀ վարչապետն էր։ Վարչապետ է  դարձել 2007 թ. խորհրդարանական ընտրությունների արդյունքում, ոչ թե մտերմության։ Չգիտե՞ր, թե անպայման պետք է սահմանդրական կարգի տապալման հետ կապող մի վերսիա մտածել և այդ մտերիմ բառն օգտագործել, որ անձեռնմխելիությունը շրջանցեր»։