«Ես էլ կառաջարկեմ, որ ամեն օր սեռավարակի թեստ հանձնի»․ ՔՊ–ական Հովհաննիսյանը՝ Թագուհի Թովմասյանին

«Ես Թագուհի Թովմասյանի ճեպազրույցի ընթացքում անցել և դիտողություն եմ արել՝ առաջարկելով բացատրել, թե ինչու հանձնաժողովի նիստերին չի գալիս, ԱԺ նիստերին չի գալիս, ինչին ի պատասխան` տիկին Թովմասյանը նման անբարո բան է գրել»,– լրագրողների հետ զրույցում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ անդրադառնալով Թովմասյանի հրապարակային պահանջին, որ ինքն ԱԺ մուտք գործելուց առաջ ամեն օր պարտադիր թեստավորվի թմրամիջոցների օգտագործման վերաբերյալ, իսկ արդյունքները լինեն հրապարակային։

«Եթե նա իրեն թույլ է տալիս կնոջը ոչ վայել նման լկտի առաջարկ անել, ապա ես էլ կառաջարկեմ, որ ամեն օր սեռավարակի թեստ հանձնի, որպեսզի հասկանանք, թե այդ 4 տունն իրեն որտեղից։ Կհորդորեմ տիկին Թովմասյանին՝ բարոյականության սահմանը չանցնի, հանգիստ նստի իր տեղը և չփորձի մարդկանց բարոյականության, անունների հետ խաղալ՝ լինելով, փաստորեն, անբարո»,-հավելել է նա։

Նրա պնդմամբ՝ ինքը նախկինում ընդդիմադիր լրագրող է եղել, իր դեմ թմրամիջոցների անվան տակ փորձել են գործ սարքել, որը չի ստացվել, իսկ հիմա էլ փորձում են զրպարտել. «Պրիմիտիվ զրպարտություն է, կմտածեմ՝ տիկին Թովմասյանի դեմ դատական հայց ներկայացնել-չներկայացնելու մասին»։

 Հիշեցնենք, որ այսօր Թովմասյանը հրապարակային պահանջել էր, որպեսզի Արթուր Հովհաննիսյանը ԱԺ մուտք գործելուց առաջ ամեն օր պարտադիր թեստավորվի թմրամիջոցների օգտագործման վերաբերյալ, իսկ արդյունքները լինեն հրապարակային։