Քննչական կոմիտեի նախագահն ընդունել է ՀՀ-ում դիվանագիտական ծառայությունն ավարտող Իրանի դեսպանին

Հայաստանի Հանրապետության քննչական կոմիտեի նախագահ Արթուր Պողոսյանն ընդունել է Իրանի Իսլամական Հանրապետության արտակարգ և լիազոր դեսպան Մեհդի Սոբհանիին, ում դիվանագիտական ծառայությունը ՀՀ-ում ավարտվում է: 

Ինչպես տեղեկացրին ՀՀ քննչական կոմիտեից, Արթուր Պողոսյանը շնորհակալություն է հայտնել դեսպանին՝ հետևողական ջանքերի և անձնական ներդրման համար, ինչի մասին վկայում է երկու երկրների իրավապահ մարմինների միջև վերջին տարիներին խորացող համագործակցությունը:  

Քննչական կոմիտեի նախագահը կարևորել է, որ անդրազգային բնույթի հանցագործությունների՝ հատկապես թմրամիջոցների մաքսանենգության դեմ պայքարում գործադրվող համատեղ ջանքերը, ինչպես նաև երկկողմ համագործակցության ճկուն մեխանիզմները նպաստել են իրավական խնդիրների շուրջ տեղեկատվության արագ փոխանակմանը և դրանց արդյունավետ լուծմանը: 

Ըստ աղբյուրի՝ դեսպանն իր հերթին շնորհակալություն է հայտնել Քննչական կոմիտեի նախագահ Արթուր Պողոսյանին՝ համագործակցության բոլոր ոլորտներում ունեցած առաջընթացի համար: 

Հանդիպման ավարտին կողմերն արձանագրել են, որ երկու երկրների քաղաքացիների վերաբերյալ տեղեկատվության փոխանակման և քննչական հանձնարարությունների կատարման օպերատիվության բարձրացման ուղղությամբ իրականացվել է արդյունավետ աշխատանք, և հույս հայտնել, որ աշխատանքները կկրեն շարունակական բնույթ: