ԵՄ-ն Ուկրաինային խոստացել է 6 միլիարդ եվրոյի ռազմական վարկ

Եվրամիության ղեկավարությունը պատրաստվում է Ուկրաինային տրամադրել 6 միլիարդ եվրոյի վարկ՝ անօդաչու թռչող սարքերի մշակման համար։ Այս մասին Ստրասբուրգում Եվրոպական խորհրդարանում իր ելույթի ժամանակ հայտարարել է Եվրոպական հանձնաժողովի նախագահ Ուրսուլա ֆոն դեր Լայենը՝ ընդգծելով, որ միջոցները կհատկացվեն տոկոսներով և նախատեսված են ինչպես պաշտպանության, այնպես էլ հարձակողական կարողությունների զարգացման համար։

Ֆոն դեր Լայենի խոսքով՝ արդեն ընթանում են բանակցություններ հատուկ դաշինք ստեղծելու ուղղությամբ, որը կներառի եվրոպական և ուկրաինական ռազմական արդյունաբերության ձեռնարկությունները։ Նրա խոսքով՝ ԵՄ-ի արդյունաբերական ներուժը պետք է օգտագործվի Ուկրաինային «դրոնների պատերազմում» առավելություն ապահովելու համար։

Ֆոն դեր Լայենը նաև կրկին կոչ է արել եվրոպական երկրներին վերջնականապես հրաժարվել ռուսական էներգակիրներից՝ դրանք բնորոշելով որպես «կեղտոտ» և վտանգավոր տարածաշրջանի էներգետիկ անվտանգության համար։ Նրա գնահատմամբ՝ ռուսական նավթի և գազի ներկրումը ոչ միայն ֆինանսավորում է Մոսկվայի ռազմական գործողությունները, այլև էկոլոգիական սպառնալիք է ստեղծում ԵՄ երկրների համար։