Հետազոտություն․ կետո-դիետան կարող է 70%-ով նվազեցնել դեպրեսիայի ախտանիշները

Օհայոյի պետական համալսարանի գիտնականների նոր հետազոտությունը ցույց է տվել, որ կետո-դիետան կարող է դառնալ դեպրեսիայի դեմ պայքարի արդյունավետ միջոց։ 10 շաբաթ շարունակ խիստ ցածր ածխաջրային սննդակարգի հետևած ուսանողների մոտ դեպրեսիայի ախտանիշները նվազել են գրեթե 70%-ով։ Արդյունքները հրապարակվել են Translational Psychiatry ամսագրում։

Հետազոտությանը մասնակցել է 16 ուսանող՝ հաստատված դեպրեսիվ խանգարմամբ, ովքեր արդեն ստանում էին դեղորայքային կամ հոգեթերապևտիկ բուժում։ Կետո-դիետայի անցնելուց հետո նրանց հոգեկան առողջության ընդհանուր մակարդակը գրեթե եռակի բարելավվել է, իսկ ճանաչողական թեստերը ցույց են տվել հիշողության, ուշադրության և տեղեկատվության մշակման արագության աճ։

Հետաքրքրական է, որ արդյունքները կապված չեն միայն քաշի նվազման հետ․ թեև մասնակիցների մեծ մասը միջինում կորցրել է մոտ 5 կգ, հետազոտողները եզրակացնում են, որ հենց սննդակարգի փոփոխությունն է նպաստել հոգեբանական վիճակի կայունացմանը։ Գիտնականները նախատեսում են անցկացնել լայնածավալ կլինիկական փորձարկումներ՝ մոտեցման արդյունավետությունն ու անվտանգությունը հաստատելու համար։