Բուլղարիայի Պլովդիվ քաղաքի Սուրբ Գևորգ հայկական եկեղեցին մեծ հանդիսավորությամբ նշել է իր տոնը

Բուլղարիայի Պլովդիվ քաղաքի Սուրբ Գևորգ հայկական եկեղեցին սեպտեմբերի 28-ին նշել է իր տոնը, որին մասնակցելու համար քաղաք է ժամանել նաև Ռումինիայի հայոց թեմի եպիսկոպոս և Բուլղարիայի հայոց թեմի փոխանորդ Տաթև եպիսկոպոս Հակոբյանը։

«Արմենպրես»-ի հաղորդմամբ՝ այս մասին հայտնում է բուլղարական BТА գործակալությունը՝ մանրամասնելով, որ տոնակատարությունը սկսվել է Սուրբ պատարագով և մատաղի օրհնությամբ։

«Տարբեր մշակութային և կրոնական կազմակերպությունների ներկայացուցիչներ հավաքվում են՝ նշելու այս կարևոր օրը մեր համայնքի և աշխարհի հայերի համար»,-բուլղարական լրատվական գործակալությանը հայտնել է Պլովդիվի Հայկական բարեգործական ընդհանուր միության (ՀԲԸՄ) նախագահ Հռիփսիմե Նուրիկյանը։

Վերջինիս խոսքով՝ կրոնն ու հավատքը միշտ եղել են հայերի հիմնական հենարանը, և անկախ նրանից, թե որտեղ են նրանք գտնվում, հայ համայնքը միշտ փնտրել է միավորման կենտրոն, որը եղել է եկեղեցին։

«Մեզ համար սրանք ամենանշանակալի տոներն են։ Որպես աշխարհի ամենամեծ հայկական ՀԿ-ի մասնաճյուղ՝ մենք միշտ աջակցել ենք մեր եկեղեցուն»,-հավելել է Նուրիկյանը։

Աղբյուրի փոխանցմամբ՝ Սուրբ Գևորգ եկեղեցու բակում տեղի է ունեցել տոնական համերգ՝ Պլովդիվի ՀԲԸՄ-ի «Յան» պարային համույթի մասնակցությամբ:

Միջոցառումը ներառված է նաև Պլովդիվի քաղաքապետարանի մշակութային օրացույցում։ Սուրբ Գևորգը Պլովդիվի հայ համայնքի համար ոչ միայն աղոթքի վայր է, այլև մշակութային և հասարակական կյանքի կենտրոն: Եկեղեցու բակում հաճախ են անցկացվում տոնակատարություններ և միջոցառումներ, և եկեղեցին շարունակում է մնալ քաղաքում ապրող հայերի ինքնության և պատմության պահապանը։

Ենթադրվում է, որ Պլովդիվի Սուրբ Գևորգ եկեղեցին կառուցվել է 1828 թվականին Փոքր Ասիայից եկած հայ արհեստավորների կողմից և տասնամյակների ընթացքում դարձել է Բուլղարիայի հայերի հավատքի, ավանդույթների և դիմադրողականության խորհրդանիշ։

Եկեղեցին մեծ պատմական և հոգևոր նշանակություն ունի Բուլղարիայի հայ համայնքի համար․ այնտեղ պահպանվում են անգին մասունքներ՝ խաչեր, գավաթներ, ձեռագիր Աստվածաշնչեր, մասունքատուփեր, որոնք փրկվել են պղծումից և պահպանել են հալածանքներից փրկված հայերի հիշողությունն ու հավատը։