Վարդան Ղուկասյանի կալանավորումը «մեսիջ» էր մյուս քաղաքական թիմերին․ Մարտուն Գրիգորյան

ԱԺ «Պատիվ ունեմ» խմբակցության անդամ, Գյումրու քաղաքապետի ընտրություններին մասնակից «Մեր քաղաքը» դաշինքի ղեկավար Մարտուն Գրիգորյանն անդրադարձել է Գյումրիի համայնքապետ Վարդան Ղուկասյանի ձերբակալությանն ու ավելի ուշ նրա կալանավորմանը։ Նրա կարծիքով՝ տեղի ունեցածը «մեսիջ» էր մյուս քաղաքական ուժերին։

«Կարելի էր այդ նույն բանն անել ծանուցելով և կարծում եմ, որ ծանուցելու պարագայում, դժվար թե, քաղաքապետը խուսափեր, փախչեր, չգնար այդ քննությանը։ Հասկանալի է, որ այդտեղ ցույց տալու բան կար, դրանում մեսիջ կար գյումրեցիներին, մյուս քաղաքական թիմերին, որ փորձեցին իրենց չափով տալ»,– նշել է Գրիգորյանը։

Անդրադառնալով իր գրառմանը՝ նա բացատրել  է, որ իր հորդորն ուղղված չէր Վարդան Ղուկասյանին։

«Խոսքը վերաբերվում էր նախընտրական շրջանում այն ամենի մասին, ինչ ասել էի իշխանությունների քայլերի հետ կապված»,– հավելել է Գրիգորյանը ու մանրամասնել․ «Ես ոչ թե քաղաքապետի պաշտոնի կռիվ էի տալիս, այլ առաջարկում էի տարբերակ, որպեսզի հավաքական ընդդիմության հաղթանակը չմսխվեր: Իմ ասածը դա է եղել»։