Դրական դինամիկա կա. ԵՏՀ ներկայացուցիչը՝ ՌԴ–ում բեռնատարների վարորդների խնդրի մասին

ԵԱՏՄ երկրներից բեռնատարների վարորդների՝ ՌԴ տարածքում գտնվելու նորմերը մշակվում են, դինամիկան ընթանում է։ Մամուլի ասուլիսի ժամանակ այս մասին ասել է ԵՏՀ ձեռնարկատիրական գործունեության զարգացման դեպարտամենտի տնօրեն Երնար Բակենովը:

«Ռուսաստանի կողմից տեսնում ենք դրական դինամիկա և արձագանք (ժամկետի երկարաձգման վերաբերյալ - խմբ)», – ասել է Բակենովը։

Նրա խոսքով` ներկայում բանակցություններ են ընթանում և պետք է սպասել դրանց ավարտին, որպեսզի ապահովվի համապատասխան մարմինների գործողությունների առավելագույն համաժամացումը:

Հիշեցնենք` 2025թ–ի հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով (այսինքն՝ միգրացիոն քարտում «այցի նպատակը» բաժնում աշխատանքը նշված չէ- խմբ․), օրացույցային տարվա ընթացքում կարող են մնալ 90 օր (նախկինում թույլատրելի էր տարվա յուրաքանչյուր 180 օրվա մեջ 90 օր- խմբ․)։ Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։