Մոսկվան և Թեհրանը մտահոգություն չեն հայտնել տարածաշրջանում ամերիկացիների ներկայության վերաբերյալ. Միրզոյան

ԱԳ նախարար Արարատ Միրզոյանն  այսօր «Օրբելի» կենտրոնի կողմից կազմակերպված խորհրդաժողովի ժամանակ հայտարարեց, որ շատ է քննարկվում ՀՀ-ում ԱՄՆ-ի  ներկայության և Մոսկվայի արձագանքի թեման։

 Նա նշեց, որ ՀՀ-ում ԱՄՆ ներկայությունը նոր չէ։

«Մոսկվան և Թեհրանը մտահոգություն չեն հայտնել TRIPP ծրագրի շրջանակներում տարածաշրջանում ամերիկացիների ներկայության վերաբերյալ։  

Նախարարը հիշեցրել է, որ Հայաստանում գործում են ամերիկյան ներկայություն ունեցող ընկերություններ, ինչպես նաև բազմաթիվ ընկերություններ արտասահմանյան այլ կապիտալով՝ արգենտինական, չինական և այլն։ Նրանցից շատերն ունեն ակնհայտ ներկայություն խոշոր ենթակառուցվածքներում։ Չեմ ուզում ժխտել՝ այն, ինչը նոր  պետք է կառուցվի կամ վերաբացվի, այսինքն՝ երկաթուղին, շատ մեծ քաղաքական ուշադրություն է հրավիրում։ Շատ լավ է, որ այնպիսի երկիրը, ինչպիսին ԱՄՆ-ն է, հետաքրքրություն ունի այստեղ։ Սա առաջին հերթին ունի տնտեսական բաղադրիչ, բայց նաև քաղաքական բաղադիրչ ունի»։

Նրա խոսքով՝ այն Ադրբեջանի և Հայաստանի համար դառնում է խաղաղության երաշխիքներից և գործիքներից մեկը։

Միրզոյանը նաև նկատեց՝ այժմ բանակցություններ են ընթանում ամերիկյան կողմի հետ։ «Իմ պատկերացմամբ՝ դա պետք է լինի հայ-ամերիկյան ընկերություն, որը կկառուցի և կզբաղվի ամենօրյա մենեջմենթով։ Սա չի նշանակում ենթակառուցվածքի ամերիկյան վերահսկողություն։ Բոլոր հարցերը, որոնք վերաբերում են ինքնիշխանությանը և լիազորություններին, լուծված են և արտացոլված ստորագրված ու հրապարակված փաստաթղթերում։ Խոսքը միայն մենեջմենթի մասին է»։