Երբ որևէ մեկն ասում է միջանցք, մեզ մոտ արթնանում է այն մտահոգությունը, որ թաքնված այլ մտադրություն կա այստեղ, որը կարող է վնասել ՀՀ ինքնիշխանությունը. Միրզոյան

 Հիմա բոլորը, երբ ասում են միջանցք, նկատի ունեն այն տնտեսական միջանցքները, լոգիստիկ ուղիները, որոնցով հետաքրքրված են աշխարհի բոլոր երկրները, հարցն այստեղ այն է, թե ով ինչ է հասկանում՝ միջանցք ասելով, «Օրբելի» կենտրոնի կազմակերպած խորհրդաժողովի ժամանակ հայտարարեց ԱԳ նախարար Արարատ Միրզոյանը։

 Նա նշեց, որ մենք էլ Հայաստանում ունենք Հյուսիս-Հարավ ճանապարհային միջանցք. «Կան այդպիսի բազմաթիվ միջանցքներ, որոնք ողջունելի են։ Այս դեպքում (Թրամփի ուղի), երբ մենք ասում ենք միջանցք, կա մի նրբություն, կխնդրեի չօգտագործել այդ տերմինը, համենայն դեպս, ենթակառուցվածքների այն կտորի մասով, որն անցնելու է ՀՀ-ով։ 

Մենք քիչ առաջ խոսում էինք այն մասին, որ տարբեր երկրներ բանակցությունների տարբեր փուլերում այս կամ այն կերպ ցանկություն են ունեցել, օրինակ, անվտանգային կամ ռազմական ներկայություն ունենալ երկաթուղու երկայնքով կամ վերահսկողություն ունենալ այդ ենթակառուցվածքի նկատմամբ։

Սակայն, ես արդեն ասացի, որ դա ՀՀ-ի բացառիկ իրավունքն է։ Երբ որևէ մեկն ասում է միջանցք, մեզ մոտ արթնանում է այն մտահոգությունը, որ թաքնված այլ մտադրություն կա այստեղ,  որը կարող է վնասել ՀՀ ինքնիշխանությունը։

Հետևաբար, կա այդ ենթակառուցվածքի համաձայնեցված պաշտոնական անուն, որի տակ կան Փաշինյանի, Ալիևի և Թրամփի ստորագրությունները»։