Եվրոպայի՝ Ռուսաստանի հետ պատերազմի նախապատրաստման համար ծախսերը կավելանան

Եվրոպան 2028 թվականից սկսած՝ տասնապատիկ ավելի շատ գումար կծախսի ռազմական շարժունակության վրա՝ ՆԱՏՕ-ի արևելյան սահմաններ զինվորների և սարքավորումների տեղափոխումը հեշտացնելու համար։ Այս մասին հայտարարել է կայուն տրանսպորտի և զբոսաշրջության հարցերով եվրահանձնակատար Ապոստոլոս Ցիցիկոստասը, հաղորդում է ՏԱՍՍ-ը։

«ԵՄ յոթամյա նոր բյուջետային շրջանակներում ռազմական շարժունակության նախագծերի բյուջեն տասնապատիկ կաճի. մենք 17 միլիարդ եվրո կհատկացնենք ռազմական շարժունակության և ենթակառուցվածքների համար», - ընդգծել է նա։

«Ռազմական շարժունակությունը» վերաբերում է ԵՄ-ի շրջանակներում ռազմական տրանսպորտի ենթակառուցվածքների զարգացմանը։ ՏԱՍՍ-ի տվյալներով՝ ՆԱՏՕ-ն, որպես ռազմական տրանսպորտի հիմնական ուղղություն, դիտարկում է արևմուտքից արևելք վեկտորը՝ դեպի Ռուսաստանի հետ սահմանները։

Նոյեմբերի 5-ին լեհական RMF FM ռադիոկայանը հաղորդել է, որ ԵՄ-ն ցանկանում է վերացնել զորքերի տեղաշարժի խոչընդոտները համայնքի ներսում։

Սա վերաբերում է այն քաղաքականությանը, որն ուղղված է Եվրոպական Միության շրջանակներում զորքերի տեղաշարժը հեշտացնելուն «Ռուսաստանի հետ հնարավոր հակամարտության» պայմաններում։