Հայաստանում պետք է անենք ամեն ինչ, որպեսզի հաղթենք․ Ռոսի

Մարկո Ռոսին ներկայացրել է Հունգարիայի ազգային հավաքականի հայտացուցակը Հայաստանի և Իռլանդիայի ընտրանիների դեմ կայանալիք հանդիպումների համար, հաղորդում է այդ երկրի ֆուտբոլի ֆեդերացիան:

Հունգարացիների հայտացուցակում կարևոր բացականեր չկան, բոլոր առանցքային ֆուտբոլիստները պատրաստ են առաջիկա խաղերին:

«Հայաստանում պետք է անենք ամեն ինչ, որպեսզի հաղթենք, այդ ժամանակ կհասկանանք, թե ինչպիսին կլինի իրավիճակը վերջին տուրից առաջ։ Բայց նաև տանը՝ Իռլանդիայի դեմ խաղում, ցանկանում ենք հաղթել։ Գիտենք, թե ինչ դժվարություններ կարող են առաջացնել մրցակիցները, բայց կփորձենք պատրաստվել լավագույն մակարդակով»,- ասել է Ռոսին:

Հունգարիայի հավաքականը 4 խաղից հետո 5 միավորով երկրորդն է մրցաշարային աղյուսակում, Եղիշե Մելիքյանի թիմը 3 միավորով վերջին` չորրորդ տեղում է: Իռլանդիայի հավաքականը 4 միավորով երրորդն է: Առաջատար Պորտուգալիայի հավաքականը 10 միավոր ունի:

Նոյեմբերի 13-ին Հայաստանի հավաքականը «Հանրապետական» ստադիոնում կընդունի Հունգարիայի ընտրանուն, նույն օրը Պորտուգալիան հյուր կգնա Իռլանդիային: Երեք օր անց Հայաստանի հավաքականը կհյուրընկալվի Պորտուգալիայի թիմին, իսկ Հունգարիայի հավաքականը կընդունի Իռլանդիայի ընտրանուն: