Ռուսաստան–Հայաստան ուղիղ երկաթուղային հաղորդակցությունը ներդրում է խաղաղության գործում. Օվերչուկ

Ռուսաստանի և Հայաստանի միջև Ադրբեջանի և Վրաստանի տարածքով ուղիղ երկաթուղային հաղորդակցությունը Հարավային Կովկասում խաղաղության հաստատման զգալի ներդրում է և ընդգծում է համագործակցության նկատմամբ համատեղ հանձնառությունը։ Այս մասին լրագրողներին ասել է Ռուսաստանի փոխվարչապետ Ալեքսեյ Օվերչուկը, հաղորդում է «ՌԻԱ Նովոստի»-ն։

«Ողջունում ենք Ռուսաստանի Դաշնության և Հայաստանի Հանրապետության միջև երկաթուղային հաղորդակցության մեկնարկը՝ Ադրբեջանի Հանրապետության և Վրաստանի տարածքով։ Հայաստանի Հանրապետության անկախացումից ի վեր առաջին անգամ մեր երկրների միջև գործում է ուղիղ երկաթուղային հաղորդակցություն։ Այս իրադարձությունը Հարավային Կովկասում խաղաղության հաստատման իրական, նշանակալի ներդրում է և վկայում է մեր աշխատանքի մասին՝ ուղղված տարածաշրջանային կայունությանը և տարածաշրջանի բոլոր երկրների տնտեսական զարգացմանը», - ասել է Օվերչուկը։

Նա նշել է, որ նոր երթուղին ամրապնդում է Ռուսաստանի տրանսպորտային կապերը Հարավային Կովկասի պետությունների հետ, մեծացնում է Եվրասիական տնտեսական միության անդամ մյուս երկրներից ապրանքների հասանելիությունը Հայաստանի շուկաներ և բարելավում է հայ արտադրողների համար ԵԱՏՄ շուկաների հասանելիությունը։
«Խորհրդանշական է, որ այս երթուղով առաջին բեռը ռուսական հացահատիկն էր՝ կյանքի և արարչագործության ամենակարևոր խորհրդանիշներից մեկը, որը ևս մեկ անգամ ընդգծում է Հարավային Կովկասում խաղաղություն հաստատելու և առճակատումից համագործակցություն անցում կատարելու համատեղ ցանկությունը», - նշել է Օվերչուկը։

Ռուսաստանի փոխվարչապետը շնորհակալություն է հայտնել Վրաստանին, ինչպես նաև Հայաստանի և Ադրբեջանից իր գործընկերներին՝ Հարավային Կովկասի տարածաշրջանում տրանսպորտային կապերի ապաշրջափակմանն ուղղված ջանքերի համար։

«Կցանկանայի շնորհակալություն հայտնել իմ գործընկերներին՝ Ադրբեջանի Հանրապետության փոխվարչապետ Շահին Մուստաֆաևին և ՀՀ փոխվարչապետ Մհեր Գրիգորյանին՝ Հարավային Կովկասի տարածաշրջանում տրանսպորտային կապերի ապաշրջափակմանն ուղղված համատեղ ջանքերի համար, ինչպես նաև Վրաստանին՝ այս երթուղով փոխադրումը կազմակերպելու գործում իր կառուցողական մասնակցության համար», - նշել է Ռուսաստանի փոխվարչապետը։