Արցախցին որեւէ կերպ չընդունեց ադրբեջանական ցորենը՝ հասկանալով, որ Արցախի թեման փակվելու է. Մետաքսե Հակոբյան

Ես ակամայից անընդհատ վերադառնում եմ ընդամենը երկու-երեք տարի առաջ տեղի ունեցած իրադարձություններին, երբ մեզ ինչ-որ իբրև թե քաղաքական գործիչների խմբակ համոզում էր, որ պիտի տնտեսական ինտեգրում տեղի ունենա Ադրբեջանի հետ, և բոլոր խնդիրները կլուծվեն, խաղաղությունը կկայանա։ Այս մասին, այսօր՝ նոյեմբերի 6–ին, լրագրողների հետ զրույցում նշեց Արցախի ԱԺ պատգամավոր Մետաքսե Հակոբյանը։

«Երբ էլի ես հետ գնում դեպի պատմություն, հասկանում ես՝ ինչպես Արցախը հայտնվեց Ադրբեջանի ճիրաններում։ Խորհրդային տարիներին էլ ոչ մեկ որպես տարածքային ամբողջականություն չի ներառել Արցախը Ադրբեջանի կազմում, զուտ տնտեսական ինտեգրման մասին է եղել խոսքը, ինչից միշտ Արցախը խուսափել է։ Եթե մենք վերադառնանք 2023 թվականի սեպտեմբեր, երբ Արցախում մարդիկ իրականում սովալուկ էին ու ծանր վիճակ էր և պիտի լիներ նաև քաղաքական որոշում՝ թույլ տալ Ակնայով բեռները մտնեին Արցախ, թե ոչ։ Ես վախեցա ընդդիմանալ և ես չհայտնեցի կոնկրետ կարծիք այդ առումով, քանի որ ժողովուրդը սոված էր և միգուցե ժողովուրդը ինքը համաձայնվի։ Եվ դուք շատ լավ հիշում եք ժողովուրդը ինչ արեց։ Ժողովուրդը իր որոշմամբ փակեց ճանապարհը և որևէ կերպ չընդունեց Ադրբեջանի տարածքով Արցախ մուտք գործող ցորենը։

Ժողովուրդը ոչ թե հպարտ էր ու ուզում էր սովից մեռնել, բայց չվերցնել այդ ցորենը։ Ոչ, պարզապես, շատ լավ հասկանում էր, որ այդ պարագայում ընդհանրապես Արցախի թեման փակվելու է, որովհետև գոյություն չունի տնտեսական ինտեգրում։ Մեզնից լավ ո՞վ գիտի, որ ադրբեջանցու հետ անհնար է խաղաղություն կերտել մի հարկի տակ, այդպիսի բան չի լինում»,–ասաց նա։

Նրա խոսքով, Նիկոլ Փաշինյանը հայտարարում էր, որ Արցախը բեռ էր, շղթա էր փաթաթված իրենց կոկորդին, և եթե Արցախը չլինի, ապա կկերտեն խաղաղություն. «Հասավ չէ՞ իր ուզածին, հանձնեց Արցախը, արցախցիներին ցրեց աշխարհով մեկ, հասցրեց ամենաստորաքարշ վիճակի, բա ինչո՞ւ չեղավ այդ խաղաղությունը, բա էլ ի՞նչ խնդիր ունի, որ ինքը պիտի շարունակի զիջել այլևս Հայաստանից»։