Շվեդական փորձը՝ առաջնորդության և մարդկային ռեսուրսների կառավարման ոլորտում

Դեկտեմբերի 16-17-ը ՆԳՆ միգրացիայի և քաղաքացիության ծառայության ղեկավար կազմը մասնակցել է Շվեդիայի միգրացիոն գործակալության կառավարման փորձի ներկայացմանը՝ հատուկ ուշադրություն դարձնելով առաջնորդության, մարդկային ռեսուրսների կառավարման և աշխատակիցների ներգրավվածության ժամանակակից մոտեցումներին։ Այս մասին տեղեկացնում են Միգրացիայի և քաղաքացիության ծառայությունից:

ՄՔԾ աշխատակիցներին ներկայացվել են Շվեդիայի միգրացիոն գործակալության գործունեությունը, կառուցվածքն ու մարդկային ռեսուրսների վարչության դերը պետական կառավարման համակարգում։ Հատկանշվել է մարդկային ռեսուրսների կառավարումը ոչ թե որպես օժանդակ գործառույթ, այլ որպես ռազմավարական բաղադրիչ։

Շվեդ մասնագետները ներկայացրել են կառավարման այն սկզբունքները, որոնք հիմնված են վստահության, պատասխանատվության և արժեքահենք մոտեցումների վրա։ Քննարկվել է առաջնորդության տեսլականը՝ շեշտադրելով ղեկավարի դերը ոչ միայն վերահսկողության, այլև աշխատակիցներին աջակցելու, նրանց ներուժը բացահայտելու և փոփոխվող միջավայրին հարմարվելու գործընթացում։

ՆԳՆ միգրացիայի և քաղաքացիության ծառայության պետ Նելլի Դավթյանը նշել է, որ միջազգային լավագույն փորձի ուսումնասիրությունն ու դրա կիրառումը էական նշանակություն ունեն Ծառայության կառավարման արդյունավետության բարձրացման համար։ Նրա խոսքով՝ մարդկային ռեսուրսների զարգացումը, առաջնորդության ժամանակակից մոտեցումների ներդրումը և աշխատակիցների շարունակական ուսուցումը հանդիսանում են ծառայության ինստիտուցիոնալ զարգացման առանցքային ուղղությունները։

Շվեդիայի միգրացիոն գործակալության փորձի համաձայն՝ ուսուցումը չի սահմանափակվում վերապատրաստումներով, այլ հանդիսանում է առօրյա աշխատանքի անբաժանելի մաս՝ հիմնված փորձի փոխանակման, համագործակցության և գործնական գիտելիքի վրա։