Սերժ Սարգսյանին «անթերի ղեկավար» համարող ՀՀԿ-ական պատգամավորը շատ հնարավոր է համարում Փաշինյանի հետ համագործակցությունը

Ազգային ժողովի Հանրապետական խմբակցության պատգամավոր Տաճատ Վարդապետյանը նույն խմբակցության 16 անդամների հետ միասին վերջերս ստորագրել էր ԱԺ արտահերթ ընտրություններ անցկացնելու վերաբերյալ հայտարարությունը:

Այնուհետև, օրերս, ՀՀ առաջին վարչապետ Արարատ Միրզոյանն իր ելույթներից մեկում նշեց, որ «Իմ Քայլը» դաշինքի ցուցակում կարող են լինել նաև «ապամոնտաժվող բարիկադներից այն կողմ գտնվող մարդիկ»:

«Գուցե լինեն գործիչներ, որոնք տարբեր ժամանակ եղել են բարիկադների մյուս կողմում կամ բարիկադների այս կողմում գտնված ուժերից»,-նշել է առաջին փոխվարչապետի պաշտոնակատարը:

Այս թեմայով ԼՈՒՐԵՐ.com-ը զրուցեց ՀՀ նախկին նախագահ Սերժ Սարգսյանին «անթերի ղեկավար» համարող, ՀՀԿ-ական Տաճատ Վարդապետյանի հետ, պարզելու, թե հնարավո՞ր է՝ այս անգամ էլ միանա վարչապետ Փաշինյանի թիմին, վերջինս պատասխանեց. «Չեմ բացառում, շատ հնարավոր է, որ առաջիկայում աշխատեմ Փաշինյանի թիմի հետ, այսքանը կարող եմ ասել»:

Իսկ հարցին, թե որն է պատճառը, որ «անթերի ղեկավարին» փոխարինում է մեկ այլ ղեկավարով, Վարդապետյանը չցանկացավ պատասխանել, պատճառաբանելով, թե արտասահմանում է և ռոումինգի տակ է խոսում:

Հիշեցնենք, որ ԱԺ արտահերթ ընտրություններ անցկացնելու վերաբերյալ հայտարարությունը Տաճատ Վարդապետյանից բացի ստորագրել էին ևս 15 պատգամավորներ՝ Աշոտ Արսենյան, Ալիկ Սարգսյան, Արտակ Սարգսյան, Արման Սահակյան, Հակոբ Գառնիկի Հակոբյան, Շիրակ Թորոսյան, Կնյազ Հասանով, Արսեն Միխայլով, Հարություն Կարապողոսյան, Սամվել Ալեքսանյան, Ռաֆիկ Գրիգորյան, Ավետ Սարգսյան, Նահապետ Գեւորգյան, Արայիկ Գրիգորյան, Իշխան Զաքարյան:

Արմինե Միքայելյան