ԱԺ չորս խմբակցությունների ներկայացուցիչները կօգտվեն պատգամավորական լիազորություններից

ԱԺ չորս խմբակցություններն իրենց հարցերը «Հարսնաքարի» քննչական խմբի ներկայացուցիչներին կուղղեն գրավոր: Այս մասին Lurer.com-ի հետ զրույցում ասաց ԲՀԿ-ական պատգամավոր Նաիրա Զոհրաբյանը: Նրա խոսքերով, իրենք ԱԺ չորս խմբակցությունների ներկայացուցիչներով երեկ հավաքվել են և որոշել, որ եթե ԱԺ նախագահը, հղում անելով օրենքի այս կամ այն կետին, գտնում է, որ իր լիազորությունների մեջ չէ հրավիրել խորհրդարան իրավապահ համակարգի ներկայացուցչին, ապա իրենք կօգտվեն պատգամավորի լիազորություններից.

«Մենք իրավունք ունենք հարցապնդմամբ դիմել ցանկացած գերատեսչության և համապատասխան օրենքով սահմանված ժամկետում պատասխաններ ստանալ: Այն հարցերը, որոնք պատրաստվում էինք ուղղել «Հարսնաքարի» քննչական խմբի ներկայացուցիչներին, կձևակերպենք գրավոր և կուղղենք այդ նույն կառույցին և պատասխանները ստանալուց հետո, արդեն կհստակեցնենք հետագա քայլերը», -նշեց Զոհրաբյանը:

Վերջինս ասաց նաև, որ ԱԺ չորս խմբակցությունների միջև այսօր նույնպես հանդիպում է լինելու:

Հիշեցնենք, որ ՀՀ ԱԺ նախագահ Հովիկ Աբրահամյանը մերժել է ԱԺ–ի 4 խմբակցությունների՝ «Ժառանգություն», ՀՅԴ, ԲՀԿ, ՀԱԿ դաշինքի կողմից հուլիսին 2–ին ներկայացված դիմումը։

ԱԺ նախագահին ուղղված դիմումում մասնավորապես առաջարկվում էր ՀՀ ԱԺ նախագահին ԱԺ պատգամավորների օրենքով նախատեսված լիազորությունների շրջանակներում կազմակերպել հանդիպում հուլիսի 17–ին «Հարսնաքար» ռեստորանային համալիրում դաժան և անմարդկային հաշվեհարդարի արդյունքում սպանված ՀՀ ՊՆ կենտրոնական կլինիկական հոսպիտալի քիչ-կոկորդ-ականջի բաժանմունքի պետ, մայոր Վահե Ավետյանի գործի քննության համար պատասխանատու իրավապահ մարմինների ղեկավարների հետ, գործի վերաբերյալ հասարակությանը հուզող հարցերի վերաբերյալ պատգամավորներին պարզաբանումներ տալու և հարցադրումներին պատասխանելու նպատակով։