Կոնկրետ ցուցիչ, որ պրոբլեմը խորն է

Ավան և Նոր Նորք վարչական շրջանների ընդհանուր իրավասության դատարանի մուտքը վաղ առավոտից փակ է։ Ակցիային միացել են նաև «Իմ քայլը» խմբակցության մի քանի պատգամավորներ։ Ակցիային մասնակցում է նաև ՊՎԾ պետ Դավիթ Սանասարյանը, որի լիազորությունները ժամանակավորապես դադարեցված են իր դեմ հարուցված քրեական գործի պատճառով: ԼՈւՐԵՐ.com- ի հետ զրույցում Սանասարյանն ասաց, որ այստեղ է որպես քաղաքացի. «Ես բոլոր ակցիաներին հնարավորինս արել եմ, որ սադրանքներ չլինեն։ Ես համարում եմ, որ պետք է ամեն ինչ լինի առանց սադրանքների և խաղաղ։ Այստեղ բոլորը տրամադրված են խաղաղ և խնդիր չկա, որ սադրանք լինի։ Առհասարակ, ես նաև քաղաքացի եմ, ով կարևորում է դատական համակարգի փոփոխման անհրաժեշտությունը, դրա համար այստեղ եմ, հարցազրույցներ եմ տալիս, խոսում եմ մարդկանց հետ, բարձրացնում եմ իմ ձայնը։ Տեսեք՝ կարող են իշխանության այլ ճյուղեր իրենց գործը անել, գործը գնա դատարան և դատարանը, այսպես ասած, գործը ջրի։ Դրա համար, երբ ասում ենք Նոր Հայաստան, ուրեմն պետք է ունենանք ամբողջական, փոփոխված համակարգ»,-նշեց նա։

Սանասարյանը նշեց, որ իր կարծիքով, ի սկզբանե դիտարկվել է փոփոխությունը, իսկ Ռոբերտ Քոչարյանի դատը գուցե մի փոքր արագացրել է այս պրոցեսը, սակայն Սանասարյանը վստահ չէ այդ հարցում։ Բայց այն, որ այս ամենը վաղուց պետք է արվեր, Սանասարյանի կարծիքով՝ միանշանակ է։

«Նիկոլ Փաշինյանի ելույթից ես ակնկալում եմ, որ այն լինի ծրագրային։ Կոնկրետ կետերով նշվի, թե ինչ փոփոխություններ պետք է արվեն և ոչ շատ ժամանակ անցնելուց հետո մենք ունենանք փոփոխված դատական համակարգ»,- ասաց Սանասարյանը։

Նա նշեց, որ տեսնում է հասարակության անվստահությունը դատական համակարգի հանդեպ. «Այդ անվստահությունը տեսել ենք նաև նոր Հայաստանում, թե ինչպես է ձևավորվել, երբ մարդիկ, որոնք որ լուրջ հանցագործության մեջ են մեղադրվել, պարզապես ազատվել են պատասխանատվությունից կամ այդ պրոցեսը երկարաձգվել է։ Դա կոնկրետ ցուցիչ է, որ պրոբլեմը խորն է»,- եզրափակեց Սանասարյանը։