«Ոսկե ծիրան»-ը կեզրափակվի Արսեն Ազատյանի և Նարինե Մկրտչյանի՝ Փարաջանովին նվիրված «Բոբո» ֆիլմով
Հրապարակումներ![«Ոսկե ծիրան»-ը կեզրափակվի Արսեն Ազատյանի և Նարինե Մկրտչյանի՝ Փարաջանովին նվիրված «Բոբո» ֆիլմով](/timthumb.php?src=disc/13-07-24/f01ba2bd61e9f75624e7e756c689963f.jpg&w=780)
Այս տարի «Ոսկե ծիրան»-ը կեզրափակվի Արսեն Ազատյանի և Նարինե Մկրտչյանի՝ Փարաջանովին նվիրված ու Փարաջանովի երևույթն ուսումնասիրող «Բոբո» ֆիլմով։ Այս մասին հայտնում են «Ոսկե ծիրան» կինոփառատոնից։
Հեղինակների պնդմամբ՝ «սա հոգեվերլուծություն է մեծ վարպետի այնկողմային էության՝ այլ չափումների որոնում, որոնց մասին միշտ չէ, որ մենք համարձակություն ենք ունենում նույնիսկ մտածելու»:
1991 թվականին ստեղծված այս փորձարարական վավերագրությունը, որտեղ ոչ միայն բացառիկ կադրեր կան Փարաջանովի կյանքի վերջին օրերից, այլև երևում է վարպետի անավարտ «Խոստովանանք» ֆիլմի նկարահանված նյութը, 1990-ականներին ցուցադրվել և պարգևատրվել է Նիոնում, Ռոտերդամում, Բեռլինում և մի շարք այլ փառատոներում։
Այժմ վերջապես վերականգնված ֆիլմը կամփոփի Սերգեյ Փարաջանովի 100-ամյակի տարվա «Ոսկե ծիրան»-ը։
Հիշեցնենք, որ Երևանի 21-րդ միջազգային «Ոսկե ծիրան» կինոփառատոնն մեկնարկել է հուլիսի 7-ին, կավարտվի հուլիսի 14-ը։ Այս տարի ևս միջազգային կինոտոնը հանրությանը ներկայացնում է մրցութային կինոնկարներ աշխարհի տարբեր երկրներից, ինչպես նաև ֆիլմեր ամենահեղինակավոր (Կաննի, Բեռլինի և այլն) կինոփառատոններից: Հայաստան են ժամանում կինոյի համաշխարհային դեմքեր, ովքեր իրենց փորձն ու արվեստը ներկայացնում են կինոսերներին։
Բացի այդ, «Ոսկե ծիրան»-ն այս տարի առանձնահատուկ անդրադարձ է կատարում երկու մեծությունների՝ Շառլ Ազնավուրի և Սերգեյ Փարաջանովի 100-ամյա հոբելյաններին:
![](banners/armflix.jpg)