«Նոր օր». Երևանում տեղի ունեցավ երիտասարդ բանաստեղծ Կոնստանտին Շաքարյանի առաջին գրքի շնորհանդեսը
Գիտություն և Մշակույթ![«Նոր օր». Երևանում տեղի ունեցավ երիտասարդ բանաստեղծ Կոնստանտին Շաքարյանի առաջին գրքի շնորհանդեսը](/timthumb.php?src=disc/16-07-24/87ba764233f5f95f90a2dcf794776abc.jpg&w=780)
Երևանի «Ռուսական գրքի տանը» այսօր՝ հուլիսի 16-ին, տեղի ունեցավ երիտասարդ բանաստեղծ, թարգմանիչ Կոնստանտին Շաքարյանի «Նոր օր» բանաստեղծությունների առաջին գրքի շնորհանդեսը:
«ԴԻԱԼՈԳ» հասարակական կազմակերպության (Մոսկվա) և Հայ-ռուսական մշակութային ասոցիացիայի (Երևան) կազմակերպմամբ՝ երիտասարդ բանաստեղծը ընթերցողին ներկայացրեց իր բանաստեղծությունների առաջին գիրքը՝ «Նոր օր», որը լույս է տեսել Մոսկվայում «ԴԻԱԼՈԳ» հասարակական կազմակերպության «Գրքի դիվանագիտություն» ծրագրի «Երկխոսություն» գրքաշարի շրջանակում։
«Գրքիս անվանումը՝ «Նոր օր», պատահական չէ ընտրված, այն խորհրդանշում է լուսաբացը գիշերից հետո, երիտասարդ մարդու կյանքի՝ մի փուլից մյուսին անցումը։ Գիրքը բաղկացած է երեք բաժիններից, որոնցից յուրաքանչյուրը բանաստեղծական ավարտ ունի՝ մանկության, սիրո, երիտասարդության և այլ թեմաներով։ Դրանցից յուրաքանչյուրն ինձ հարազատ է ու կարևոր»,-ասաց Կոնստանտին Շաքարյանն ու ներկաների համար ընթերցեց ամենասիրելի գործերից մի քանիսը։
Նշենք, որ թեև Շաքարյանի բանաստեղծությունները վերջերս են հայտնվել ռուսական և արտասահմանյան պարբերականներում, սակայն, նա հասցրել է արժանանալ 2020 թվականի լավագույն դեբյուտի համար «Զվեզդա» ամսագրի մրցանակին:
Կոնստանտինի բանաստեղծությունները, թարգմանությունները և գրական ակնարկները տպագրվել են «Գրական Հայաստան», «Աստղ», «Մեր ժամանակակիցը», «Պոետոգրադ», «Մոսկվա», «Լողացող կամուրջ», «Նոր հանդես», «Գաղթական լիրա», «Կաթ», «Գրականության օր» և այլ պարբերականներում։
Շնորհանդեսին ներկա ոլորտի ավագ սերնդի ներկայացուցիչների կողմից ևս գովեստի բազմաթիվ խոսքեր հնչեցին նրա հասցեին։ Փորձառու բանաստեղծները միահամուռ նշեցին՝ փայլուն ապագա է սպասվում երիտասարդ բանաստեղծին, դե իսկ Դ. Չկոնիան ժամանակին Շաքարյանի բանաստեղծություններն անվանել է «ռուսական ժամանակակից պոեզիայի լուրջ ձեռքբերում»։
Իր հերթին «ԴԻԱԼՈԳ» հասարակական կազմակերպության նախագահ Յուրի Նավոյանը նշեց, որ հաջորդ գիրքը, որ պատրաստ են հրապարակել, արցախցի բանաստեղծ Ալբերտ Ոսկանյանի գրվածքների ժողովածուն է։
«Մեր՝ հայերիս միջավայրում, ընդունված է ասել, որ տղամարդը պետք է տուն կառուցի, ծառ տնկի և որդի ունենա, իմ կողմից ուզում եմ հավելել, որ տղամարդը նաև պետք է գրքեր հրապարակի»,-ասաց Յուրի Նավոյանը։
![](disc/16-07-24/82c44162850690973aff91f657527b46.jpg)
![](disc/16-07-24/676bf878f9d3d30293f9b6ce8010120f.jpg)
![](disc/16-07-24/1c14663755824165ba01312a8047c35b.jpg)
![](disc/16-07-24/57b8eea002df8ea1d1931e0a0e3ba22c.jpg)
![](disc/16-07-24/207f84ac01d56374d3e2b623d777a2b2.jpg)
![](disc/16-07-24/b6ad003e1e3ac67bf9a861d6fa79a201.jpg)
![](disc/16-07-24/b15dec45292c2925ffaeada1f29bec45.jpg)
![](disc/16-07-24/0c62c346264ec83a180402738e6785db.jpg)
![](disc/16-07-24/ec7257ccb7fae13562e4400dd2c79821.jpg)
![](disc/16-07-24/732119ace99593a756591886d988e876.jpg)
![](banners/armflix.jpg)