Երևան-Քիշնև չվերթի շուրջ 50 ուղևորի թույլ չեն տվել մեկնել․ «FlyOne»-ը մեկնաբանել է
Հասարակություն![Երևան-Քիշնև չվերթի շուրջ 50 ուղևորի թույլ չեն տվել մեկնել․ «FlyOne»-ը մեկնաբանել է](/timthumb.php?src=disc/23-07-24/1ba80c2d708d25ce898f0d406c728c63.jpg&w=780)
Երևան-Քիշնև-Երևան չվերթի մի քանի տասնյակ ուղևորներ չեն կարողացել մեկնել, քանի որ օդանավի փոփոխություն է եղել։ Sputnik Արմենիայի հետ զրույցում այս մասին ասաց «FlyOne Armenia» ավիաընկերության խորհրդի նախագահ Արամ Անանյանը՝ ընդգծելով, որ օդանավի փոփոխությունը տեղի է ունեցել օպերացիոն անհրաժեշտությամբ պայմանավորված։
Ավելի վաղ Sputnik Արմենիայի հետ կապ էր հաստատել ժամը 15։00-ի չվերթով Երևանից Քիշնև մեկնող ուղևորներից մեկը՝ նշելով, որ իրեն և ևս շուրջ 50 ուղևորի չի թույլատրվել օդանավ բարձրանալ, և որևէ բացատրություն կամ հիմնավորում չի ներկայացվել։
«Նմանօրինակ իրավիճակների համար ավիաընկերությունն ունի հստակ քաղաքականություն, ավիաընկերության ներկայացուցիչներն օդանավակայանում բոլոր ուղևորներին ներկայացրել են բոլոր հնարավոր տարբերակները»,- նշեց Անանյանը։
Նրա խոսքով՝ ամառվա այս շրջանում նման խնդիրներ լինում են բոլոր ավիաընկերությունների հետ։ Խնդիրը զուտ գործառնական-տեխնիկական է։
«Քանի որ չվերթն իրականացնող ինքնաթիռի տարողունակությունը եղել է ավելի փոքր, քան նախորդ օդանավինը, որոշ ուղևորների առաջարկվել է չվերթի ժամկետի փոփոխություն այսօրվա՝ ավելի ուշ ժամի համար կամ հետագա՝ այլ չվերթերի»,- հավելեց նա։
Անանյանը նշեց, որ յուրաքանչյուր ուղևորի հետ անհատական աշխատանք է տարվում խնդիրը կարգավորելու համար։
Մեկնաբանելով այն հարցը, թե ինչպես է ստացվել, որ նույն ընտանիքի մի քանի անդամի թույլատրել են թռչել, մյուսներին՝ ոչ, Անանյանը նշեց՝ քանի որ տեղի է ունեցել օդանավի փոփոխություն, ուղևորների տեղաբաշխումը համակարգն ավտոմատ կերպով է իրականացրել։
Նշենք, որ Sputnik Արմենիա զանգահարած ուղևորը նաև հայտնել էր, որ չմեկնած ուղևորների փոխարեն թռիչքով մեկնել են «Արարատ-Արմենիա» ակումբի ֆուտբոլիստները։ Վերջին պահին ուղևորների մի մասի տեղերում նստեցրել են մարզիկներին։
Հավելենք, որ ըստ «Զվարթնոց» օդանավակայանի չվացուցակի՝ ավիաընկերության Երևան-Քիշնև հաջորդ թռիչքը նախատեսված է 01։00-ին, ևս մեկը` հուլիսի 24-ին, կրկին 15։00-ին։
Մեզ հետ զրույցում ուղևորներից մեկը հայտնեց, որ չմեկնած ուղևորներից մի քանիսին առաջարկվել է մեկնել հուլիսի 24-ի թռիչքով, մյուսներին՝ հուլիսի 26-ի։
![](banners/armflix.jpg)