Վարդենիս համայնքի ղեկավարը պարգևատրել է միջազգային մրցույթ -փառատոնի մրցանակակրին և նրա ուսուցչին
Հասարակություն![Վարդենիս համայնքի ղեկավարը պարգևատրել է միջազգային մրցույթ -փառատոնի մրցանակակրին և նրա ուսուցչին](/timthumb.php?src=disc/23-07-24/c2fa8a72af7a66a91c9d4ceb7ec643ce.jpg&w=780)
Գեղարքունիքի մարզի Վարդենիս համայնքի ղեկավար Ահարոն Խաչատրյանն ընդունել, շնորհավորել և պարգևատրել է վերջերս Վրաստանի Բաթումի քաղաքում տեղի ունեցած միջազգային մրցույթ-փառատոնում Գրան պրի հատուկ մրցանակի արժանացած Հասմիկ Ղասաբյանին և նրա ուսուցիչ, Վարդենիս քաղաքի Մհեր Մկրտչյանի անվան մշակույթի պալատի տնօրեն Արմեն Խաչատրյանին։
Ինչպես «Արմենպրես»-ը տեղեկացավ Վարդենիսի համայնքապետարանի աշխատակազմից, Բաթումի քաղաքում տեղի ունեցած միջազգային 8-րդ «Wonderland» մրցույթ- փառատոնին մասնակցություն են ցուցաբերել 13-ից ավել երկրներ, այդ թվում՝ Հայաստանը։ Վարդենիսի Մհեր Մկրտչյանի անվան մշակույթի պալատի սան Հասմիկ Ղասաբյանը երգի լավագույն կատարման համար արժանացել է գլխավոր՝ Գրան պրի հատուկ մրցանակին։
Համայնքի ղեկավարը Հասմիկ Ղասաբյանին ու նրա ուսուցչին արժանացրեց դրամական խրախուսանքի՝ յուրաքանչյուրին 100․000-ական դրամի չափով։
«Միջազգային մրցույթ-փառատոնում շահած Գրան պրի մրցանակը խոսում է կատարված արդյունավետ ու նվիրական աշխատանքի մասին, որը չի կարող չարժանանալ մեր հատուկ ուշադրությանը։ Մեզ մնում է միայն հպարտանալ, որ նման շնորհալի մանկավարժներ ու սաներ ունենք, ովքեր մեր քաղաքի, համայնքի ու հանրապետության անունը հնչեցնում են նաև արտերկրի բեմերում»,-նշեց Վարդենիս համայնքի ղեկավար Ահարոն Խաչատրյանը։
![](banners/armflix.jpg)