Հակոբ Հակոբյանը պատասխանեց պարտադիր կուտակային վճարների հարկման մասին ՍԴ նախագահի մտահոգությանը

Սահմանադրական դատարանում ընթացող «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննությանը պատասխանող կողմից ելույթ ունեցող Հակոբ Հակոբյանը պատասխանեց ՍԴ նախագահի և դատավորների հարցերին։ ՀՀ Սահմանադրական դատարանի նախագահ Գագիկ Հարությունյանի այն հարցին ի պատասխան, թե ինչպիսի լուծումներ են նախատեսված այն դեպքերում, երբ պետական աշխատողների աշխատավարձերը բարձրացվելու են օրենքով, իսկ ոչ պետական ոլորտում հնարավոր չէ գործատուին պարտադրել աշխատողի համար սահմանել այսքան կամ այնքան աշխատավարձ, Հակոբ Հակոբյանը նշեց, որ լուծումը հիմնված է ազատական տնտեսության ցիկլի վրա։ «Իհարկե, օրենքի սահմաններում մենք ոչ պետական հատվածը չէինք կարող կարգավորել, սակայն ազատական տնտեսության մեջ որպես գործիք կարող ենք օգտագործել միայն նվազագույն աշխատավարձը։ Պետական ոլորտի աշխատավարձի բարձրացումն ինքնըստինքյան նպաստելու է շուկայի աշխատավարձերի բարձրացմանը։ Երբ պետական ոլորտը կարողացավ իր աշխատողների աշխատավարձերը բարձրացել, շուկան ինքնըստինքյան հետևեց դրան։ Սա ազատական տնտեսության ցիկլ է»,- ասաց Հակոբյանը։

ՀՀ Սահմանադրական դատարանի նախագահը նկատեց, որ կան դժգոհություններ, որ պարտադիր կուտակային վճարները ևս հարկվում են, այնինչ «Եկամտային հարկի մասին» օրենքի 6-րդ հոդվածով սահմանված է, որ եկամտահարկը հաշվարկվում է միայն նվազեցվող եկամտահարկը հանելուց հետո։ Դիմելով պատասխանող կողմին՝ Հարությունյանը նշեց, որ միջազգային պրակտիկայում գրեթե չկան այնպիսի դեպքեր, երբ կուտակային վճարները հարկվեն, քանի որ դրանք նվազեցվող եկամուտներ են համարվում։ «Ինչո՞ւ մենք չենք գնացել այդ ճանապարհով և ինչո՞ւ չենք առանձնացրել պարտադիր կուտակային վճարները»,-ասաց Հարությունյանը։

«Մենք շարժվել ենք հետևյալ երկու սկզբունքով՝ պարտադիր կուտակայինը վերջում ստանալուց հետո հարկման ենթակա չէ, իսկ կամավոր կուտակայինը հարկման ենթակա է։ Պարտադիր կուտակայինին տալով որոշակի արտոնություններ, մենք փորձել ենք փոխհատուցել պետական բյուջեի 5 տոկոսի ներդրումը և կկարողանանք պահել հավասարակշռությունը»,-ասաց Հակոբյանը։

ՍԴ անդամ Վոլոդյա Հովհաննիսյանը մեջբերեց Սահմանդրության 32-րդ հոդվածը, որով սահմանված է, որ յուրաքանչյուր քաղաքացի ունի արդարացի և օրենքով սահմանված կարգով նվազագույնից ոչ ցածր աշխատավարձի իրավունք։ «Այսօր նվազագույն աշխատավարձը 45 հազար դրամ է, իսկ օրենքում ասում է, որ չի կարելի հարկել նվազագույն աշխատավարձը, քանի որ դա ուղղված է որոշակի կենսական մինիմումի ապահովմանը։ Այս պարագայում ո՞վ պետք է վճարի քաղաքացու փոխարեն կենսաթոշակային վճարը, որպեսզի նա կարողանա նվազագույն ախատավարձ ստանալ»,-ասաց Հովհաննիսյանը։

Պատասխանելով Հովհաննիսյանի հարցին՝ Հակոբյանը նշեց, որ այդ հարցի լուծումը հիմա շատ բարդ է։ «Մենք ունենք օրենսդրությամբ նախատեսված և՛ նվազագույն աշխատավարձ, և՛ կենսապահովման բյուջե, որն իր էությամբ մեծ կամ հավասար է նվազագույն աշխատավարձին։ Կենսապահովման բյուջեն հարկման ենթակա չէ, իսկ նվազագույն աշխատավարձը՝ հարկվող է։ Կարծում եմ' հարցի իրավական մասը մենք կարող ենք լուծել մինչև օրենքի ուժի մեջ մտնելը»,-ասաց պատասխանող կողմի ներկայացուցիչ Հակոբ Հակոբյանը։

Սահմանադրական դատարանում մարտի 28-ին սկսվել է «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննությանը՝ ՀՀ ԱԺ պատգամավորների դիմումի հիման վրա: Պատասխանող կողմ է ՀՀ Ազգային ժողովը: