ՊՆ և ԶՈւ ղեկավար կազմը քաջատեղյակ է եղել Ազատի զինվորական կացարանի պայմաններից, բարձիթողի իրավիճակը հանգեցրեց ողբերգության. Նորիկյան

«Այսօր ևս մեկ անգամ հավաստվեց, որ պաշտպանության նախարարության և Զինված ուժերի գլխավոր շտաբի  ղեկավար կազմն առնվազն քաջատեղյակ է եղել Ազատի զինվորական կացարանի պայմանների մասին, առկա թերությունները վերացնելուն ուղղված որևէ քայլ չի իրականացվել»,- Ազատ գյուղի զինվորական կացարանում զոհված 15 զինծառայողների գործով դատական նիստից հետո լրագրողներին ասաց տուժողների շահերի ներկայացուցիչ Նորայր Նորիկյանը։

Նշենք, որ այսօր հարցաքննվեց դեպքի ժամանակ զորամասի ինժեներական ծառայության պետի պաշտոնը զբաղեցրած Տիգրան Ղազարյանը։

«Նախաքննության ընթացքում տրված ցուցմունքներում և այսօր՝ դատարանում տված ցուցմունքներում բազմաթիվ  ուշագրավ  հանգամանքներ կային, բայց ինձ, որպես տուժողների լիազոր ներկայացուցիչ, հետաքրքրում էր իր ցուցմունքի այն հատվածը, որը վերաբերում էր այդ զինվորական կացարանի պայմաններին, չափորոշիչներին, անձնակազմի այնտեղ տեղավորելուն, դրա վերաբերյալ վերադաս հրամանատարության՝ ընդհուպ մինչև  ՀՀ զինված ուժերի ղեկավար կազմի ներկայացուցիների իրազեկ լինելուն»,- ասաց Ն. Նորիկյանը։

Նա նշեց, որ իր համար ակնհայտ է՝ բարձիթողի իրավիճակը ինչպես այդ ժամանակահատավում, այնպես էլ  դրան նախորդող ժամանակահատվածում,  հանգեցերել է այս ողբերգական դեպքին։

«Այսօրվա ցուցմունքն ու հարցերին պատասխանելը ևս մեկ անգամ հավաստում են, որ եթե  իրավասու պաշտոնատար անձանց կողմից ժամանակին  իրականացվեր Հայաստանի գործող օրենսդրությամբ իրենց  վերապահված իրավասությունները, պարտականությունները, հնարավոր է  այս ողբերգական դեպքը չլիներ»,- ասաց նա։

Այսօրվա նիստը ընդմիջվել է մեղադրյալներից մեկի ինքնազգացողության վատացման պատճառով։ Ն. Նորիկյանը նշեց, որ Տիգրան Ղազարյանին դեռ հարցեր ունի ուղղելու, որը կշարունակվի հաջորդ նիստի ընթացքում։