Պղպեղի «Լոշտակ», պոմիդորի «Ռուբինա», «Արա» սորտերի սերմերը հասանելի են հայ գյուղատնտեսների գրպանին

Հայ գյուղատնտեսներն սկսել են ավելի շատ օգտագործել տեղական արտադրության սերմեր: ՀՀ գյուղատնտեսության նախարարության բանջարաբոստանային և տեխնիկական մշակաբույսերի գիտական կենտրոնը տարեցտարի արտադրում և շուկա է բաց թողնում նոր սերմեր, որոնք հարմարեցվում են շուկայի պահանջարկին: Այս մասին լրագրողների հետ հանդիպման ժամանակ հայտնեց ԳՆ բանջարաբոստանային և տեխնիկական մշակաբույսերի գիտական կենտրոնի տնօրեն Գայանե Սարգսյանը: «Այս պահին շրջանացման ընթացքում է գտնվում հինգ սորտ' դրանցից մեկը «Լոշտակ» անվանումով պղպեղն է, որը շատ մեծ է, մսոտ, շոգի հանդեպ ավելի դիմացկուն է և նապաստակի ականջների ձև ունի: Այդ սորտերից են նաև պոմիդորի «Արա», «Նորք» տեսակները, որոնք ավելի ամուր են, ավելի փոխադրունակ»,- ասաց Գայանե Սարգսյանը' նշելով, որ իրենք աշխատում են այնպիսի սորտեր ստեղծել, որոնք ավելի դիմացկուն են և բերքատվությունն էլ բարձր է:

Նրա հավաստմամբ, իրենց կողմից արտադրվող սերմերը հասանելի են գյուղացիներին ու շատ մատչելի են: «Բոլոր խանութներում, որտեղ վաճառվում են սերմեր, կան նաև մեր կողմից արտադրվող սերմերը, որոնք բավականին մատչելի են: Հինգ գրամանոց փաթեթի արժեքը 100-380 դրամ է' նայած, թե ինչ տեսակի սերմ է: Նույնիսկ կարելի է ասել, որ սերմը վաճառում ենք ինքնարժեքով, անում ենք այնպես, որ ֆերմերի համար մատչելի լինի»,- հայտնեց կենտրոնի տնօրենը:

Գայանե Սարգսյանի խոսքով` բացի ավանդական մշակաբույսերից, իրենք նաև ստեղծում են ոչ ավանդական, դրսից ներմուծվող մշակաբույսերի սերմեր: «Շուկայի պահանջարկը փոխվում է, որպեսզի կարողանանք մրցակցել, ստեղծում ենք այնպիսի մշակաբույսեր, որոնք ներմուծվում են դրսից: Օրինակ, հիմա դուք սովորական շուկաներում կտեսնեք տեղական արտադրության բրոկոլի, բրյուսելյան կաղամբ»,-ասաց նա:

Անդրադառնալով ֆերմերների կողմից մշակաբույսերի պարարտացման և դրանից բխող վտանգավոր հետևանքների հարցին` Գայանե Սարգսյանը նշեց. «Անվտանգ ու էկոլոգիապես մաքուր գյուղատնտեսական մթերքների հարցը շատ կարևոր է: Բնական է, որ ֆերմերներն օգտագործում են պարարտանյութեր ավելի լավ արտադրանք ստանալու համար, բայց կարևոր է, որ պարարտացումը միակողմանի չլինի: Ներկայումս Գյուղնախարարությունը հենց այդ նպատակով սուբսիդավորում է պարարտանյութերի տրամադրումը, որ ամեն պարարտանյութ չօգտագործեն: Այս տարի ֆերմերներին, բացի ազոտական սելիտրայից, տրվում են նաև ֆոսֆորական և կալիումական պարարտանյութեր»,-հայտնեց Գայանե Սարգսյանը:

Նրա տեղեկացմամբ` հայ ֆերմերներն ավելի գրագետ են դարձել: «Մեր մոնիտորինգի արդյունքները ցույց են տալիս, որ տարեցտարի նրանք ավելի ճիշտ են վարում իրենց աշխատանքները: Բացի այդ, ֆերմերներն սկսել են մասսայական ոռոգումը փոխարինել կաթիլայինով' հասկանալով, որ ջրի խնդիր ունենք: Կաթիլային համակարգը հնարավորություն է տալիս քիչ քանակի պարարտանյութեր կիրառել' պարարտացնելով միայն արմատը»,- նշեց Բանջարաբոստանային և տեխնիկական մշակաբույսերի գիտական կենտրոնի տնօրենը:

Կենտրոնի ստեղծման օրվանից մինչ օրս արտադրվել է 4000 սորտանմուշ, որոնցից 116-ն են շրջանացված ու հավաստագրված և վաճառքում գտնվում: